ARGIA.eus

2020ko ekainaren 04a
Ismael Morvan, Bretainiako Diwan eskolako ikaslea

"Bretoiera bizi publikoan sartu nahi dugu"

  • Diwan lizeoetako 15 ikaslek erabaki zuten baxoaren matematika proba bretoieraz egitea, nota apalena ukateko arriskua harturik.

Ipar Euskal Herriko Hitza @iehkohitza
2018ko uztailaren 06a

Diwan eskoletan egiten ditu ikasketak. Baxoaren proba bakarra bretoieraz egiteko aukera dute legez, historia-geografiarena, baina aurten 15 ikaslek erabaki dute matematikena ere bretoieraz eginen zutela.

Oihartzuna ukan du zuen ekimenak. 15 ikaslek matematika proba bretoieraz egin duzue.

Bai, errektoretzari baimen berezi bat eskatu genion matematikak bretoieraz pasa ahal izateko. Ezezkoak besterik ez ditugu jaso, batere aterabiderik gabe. Zinez nahi genuen gauzak aitzinarazi eta ezezko automatikoak zirenez parean, ez zen elkarrizketarako paradarik ere. Beraz erabaki genuen halere bretoieraz egitea.

Dirudienez aitzineko urteetan ere ikasle batzuek hala egin izan dute, baina aurten 15 zineten, taldean.

Uste dut bakoitzak bere aldetik pentsatua zuela urtean zehar, baina sobera zehaztu gabe. Baxoa hasi aitzin, hiru aste lehenago, hasi ginen aipatzen zer egin zitekeen gauzak aldarazteko guretzat eta ondoko belaunaldientzat. Gogoeta eraman dugu, eztabaidatu eta bozkatu dugu. 15 prest ginen matematikak bretoieraz pasatzeko. Pentsatzen dut lizeoko beste ikasle guztiek sostengatzen gaituztela baina ez dute denek arriskua hartu nahi izan.

Hain zuzen, baxoa ezinbestekoa da unibertsitatera joateko, besteak beste. Huts egitearen arriskua hartzeko prest zineten?

Arriskua ezagutzen genuen eta hartzeko prest ginen. Baloratu behar da inportanteena zer den. Egia da urtea errepikatzeko gogorik batere ez dudala, baina beste aldetik zinez nahi dut gauzak aitzinatzea, hizkuntzak leku garrantzitsuago bat ukan dezan. Ez da ezer eskatzen duguna! Soilik baxoko proba bat, jakinez zuzentzaileak badirela horretarako. Bretoiera bizi publikoan sartu nahi dugu.

Sostengua ukan duzue?

Bai. Prentsaurreko bat egin genuen jakinarazteko egin genuena eta segidan artista bretoien sostengua ukan dugu, sostengu politikoa ere -eskualdeko presidente Loïg Chesnais-Girardena besteak beste-. Sostengua denetatik ukan dugu, nik etxean ere… Bestalde gure kopiak zuzenduak izan daitezen izenpedura bilketa bat abiatu zen interneten eta aste batez 11.000 sinadura bildu ziren (13.000 gaindituak ditu orain). Bada jendea gibeletik eta gure ekintza indartzen du erakusten duelako hizkuntza garatzeko nahia badela.

Brebetarekin ikusi da errektoretzaren nola erantzuna izan den Euskal Herrian eta Bretainian.

Gure kasuan zero bat biltzeko arriskua dugu, baina ez dakigu sobera zer gertatuko den orain. Baina uste dut inportantea litzatekeela zubiak egitea Euskal Herria eta Bretainia artean, borroka berdina delako. Espero dut gauzak mugituko direla, gauzak aldatuko direla, eta Bordele eta Roazhoneko errektoretzek ulertuko dutela eboluzioa hizkuntza “gutxituekin” egin behar dela.

Azken hitz bat?

Ekintza egin genuenetik usu entzun dut gurasoen eta irakasleen eragina ukan dugula… Ohar horrek anitz gaitzitzen gaitu zeren zinez guk dugu gogoeta eraman eta badira hiru aste gure artean antolatzen dugula dena.

Elkarrizketa hau Ipar Euskal Herriko Hitzak argitaratu du eta Creative Commons lizentziari esker ekarri dugu.

Kanal hauetan artxibatua: bretoiera  |  Bretainia  |  Ikasle mugimendua

bretoiera kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude