ARGIA.eus

2020ko apirilaren 08a

Bi pertsona identifikatu ditu Ertzaintzak Zarautzen, etxegabeen neguetxea irekitzearen aldeko kontzentrazioan

  • Manifestari bat eta kazetari bat identifikatu dituzte larunbatean, etxegabeen aterpea ireki ez izana salatzeko udaletxearen aurrean eginiko kontzentrazioan. Udalaren "utzikeria" salatu eta honela adierazi dute igandeko prentsaurrekoan: “Geratzen zaigun aukera bakarra arazoari geuk heltzea eta kolektiboki erantzutea da”.

ARGIA @argia
2019ko martxoaren 17a

Neguetxea ireki dinamikaren baitan, Geriza herri ekimen eta proiektuaren izenean, Zarauzko udaletxearen aurrean bildu zen herritar multzo bat beste larunbat batez. Deia inoiz baino zabalagoa izateak beste kontzentrazioetan baino jende gehiago elkartzea egin zuen, eta ekintzaren nondik norakoak ere halakoak izan ziren. “Dozena erdi ertzain agertu zitzaizkigun kontzentrazioaren orduan, eta bi pertsona identifikatu zituzten mehatxupean; kazetari bat eta kontzentrazioan zegoen kide bat”, adierazi dute ekimeneko kideek igandean eginiko prentsaurrekoan. Egunean zehar Ertzaintza “jarraika” izan zutela ere esan dute.

Urtarriletik datorren kontua da. Azken zortzi urteetan etxegabeei neguan aterpea emateko erabili den eraikina aurten ez zela irekiko iragarri zuen Zarauzko Udaleko Gizarte Zerbitzuen sailak. “Inork ez du horrelako leku bat etxe alboan izan nahi” esan zuen saileko arduradunak, Geriza ekimeneko kideek salatu dutenez. Erabakiaren aurrean hainbat herritarrek igandetan biltzeko hautua egin zuten, arazoari konponbidea bilatzeko. Hasieran formalki eskatu zioten udal gobernuari zerbitzua ematen jarraitzeko, baina eskaera ezerezean geratu eta aurrera egin zuten: “Utzikeria horren aurrean, bideari ekin genion gure kasa”.

“Errepresioaren bidez isilarazten saiatu dira”

Larunbateko gertaerari buruz mintzatu dira igandeko prentsaurrekoan. Udala jarri dute jomugan, polizia bertara bidaltzeagatik: “Ez da neguetxea ez duzuela ireki nahi: indarrez mantendu nahi duzue itxita”. Aurreko bost asteetan egindako kontzentrazio eta ekintzetan ez dela halakorik gertatu esan dute, baina herritarrengan “kontzientzia eta inplikaziorako beharra” zabaltzen hastean, Udalak poliziaren “errepresioarekin” erantzun izana salatu dute."Argi erakutsi du Udalak ez duela nahi neguetxearen eztabaida publikoki eman dadin", azpimarratu dute.

Larunbatean, indar poliziaren presentzia handia izan zen lehen unetik. 12:00etarako deitua zegoen kontzentrazioa, eta ordua baino lehen Ertzaintza eta Udaltzaingoa bertan zen jada. Lehen aldarrikapen oihuekin batera esku hartu zuen poliziak: kontzentrazioko kide bat identifikatu zuten. Haren ondoren lanean ari zen Hitza agerkariko langilea identifikatzera behartu zuten, argazkiak ateratzeagatik.

Babesa eskertu eta aurrera

Zarauzko herritarren, inguruko herrietako herritarren eta antzerako proiektuen babesa eskertu dute. Larunbat arratsean mahai-inguru jendetsua egin zuten; Irungo Harrera Sarea, Gernikako Eztena, Artea eta Txantxarreka gaztetxeko kideak izan ziren bertan euren proiektuez hitz egiten.

“Larunbateko errepresio polizialaren aurrean, gure hautua berresten dugu: geratzen zaigun aukera bakarra arazoari geuk heltzea eta kolektiboki erantzutea da”, esan dute prentsaurrekoan. Arazoarekiko kezka duen ororen parte hartzea beharrezkoa dela nabarmendu dute. Esku bat botatzeko prest dagoena Gerizarekin kontaktuan jartzeko eskatu dute, negukoetxea@gmail.com helbidera idatzita edo sare sozialen bitartez.

Bideo bidez zabaldu dute prentsaurrekoa:

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Pobrezia  |  Zarautz

Pobrezia kanaletik interesatuko zaizu...
Azkenak
EGILEA
Argia buletina
Egunaren laburpena
zure e-postan
Eguneraketa berriak daude