Azken biktimaren izena Dijon Kizzee da, 29 urte zituen eta bizikletan zihoan astelehen arratsaldean, polizia bat hura atxilotzen saiatu zenean, ustezko trafikoko arau-hauste batengatik.

Sheriffaren arabera, gizonak "korrika ihes egin zuen" bizikleta atzean utzita, eta poliziek harrapatu zutenean horietako bati aurpegian jo zion. Ihesi zihoala, eskuan zeramatzan arropa batzuk erortzen utzi zituen. "Agenteek arropa pilaren barruan pistola erdiautomatiko bat zegoela nabaritu zuten", esan zuen Brandon Dean Los Angeleseko sheriffaren bulegoko tenienteak prentsaurrekoan. Une horretan, agenteek tiro egin zuten. Gaztea, hainbat balak jota, bertan hil zen.

Agintariek ez dute argitu tiroak jaso zituenean gizona arma bila ari ote zen. Deanek esan du ikerketa abiatu dutela.

Ben Crump eskubide zibilen abokatuak adierazi duenez, Kizzeek 20 tiro baino gehiago jaso zituen, eta gertakarien lekukoei eskatu die informazio gehiago edukiz gero eman dezatela. "Korrika egin omen zuen eta arropa eta pistola erori zitzaizkion", idatzi du Crumpek txio batean. "Ez zuen jaso, baina poliziek 20 aldiz baino gehiagotan tiro egin zioten bizkarretik, eta gero hainbat orduz utzi zuten".

Tiroketa izan eta ordu batzuetara, ehun bat pertsona bildu ziren hilketaren lekuan justizia eskatzeko, Black Lives Matterren pankartekin eta justizia eskatuz. Talde txiki bat bildu zen berriz ere astearte gauean: modu baketsuan sheriffaren komisariaraino joan ziren, polizia-helikoptero bat manifestazioaren gainetik hegan zebilen bitartean. Manifestari batzuek "atxilotu polizia hiltzaileak" zioten kartelak zeramatzaten.