Badalonako auzitegian aurkeztu duen idatzian, fiskaltzak salatu du Bartzelona metropoliko erraustegiak erabiltzen dituela “ingurumen arauak urratzen dituzten jokabideak”, hauekin “arrisku larrian jarri dutela erraustegi inguruetan bizi diren herritarren osasuna” eta horien erantzule egiten ditu Tersa enpresa publikoko lehendakaria den Eloi Badia, Bartzelonako Udalean Larrialdi Klimatikoen zinegotzia ere badena eta enpresaren kudeaketa arduraduna, La Vanguardia egunkariak FRG siglekin identifikatu duena.

Lege urraketa nagusia legoke hondakinak erretzeko tenperaturan. Europako zuzentarauak derrigortzen du labeetan sartutako zabor guztiek gutxienez bi segundotan jasatea 850 ºC-ko tenperatura, hori jotzen delako dioxinak desegiteko beharrezko neurria, eta errauste planten arduradunek hori egiaztatu behar dutela labe barruan ipinitako neurgailuen bidez. Hori ez dute betetzen, fiskalaren arabera, eta horren ordainez Generalitatearen Ingurumen Kalitate zuzendaritzari tenperatura egiaztatzen diote algoritmo bidezko kalkulu eta formulen bidez.

La Vanguardia-k fiskaltzaren dokumentazioan ikusi ahal izan duenez, ikerketak arakatu ditu 2015etik 2019ra arte erraustegiko arduradunek aurkeztutako dokumentazioak eta horietatik ondorioztatu du “sarritan labeetako tenperatura ez dela iristen 850 ºC horietara, ez dutela bermatu araudiak eskatzen duen tenperatura maila eta honek arrisku larria eragin duela”. Antza denez, erraustegiko arduradunei aurkitutako 2011ko barne komunikazio batek iradokitzen du 850 ºC-etaraino ez zirela iristen horretarako erre beharreko gas naturalaren kostua aurrezteko.

Generalitateak, beti fiskalaren arabera, 2018an enpresari eskatu zion laguntzazko erretzaile batzuk erabiltzeko labeetan tenperatura 850 ºC-en azpitik geratzen zen aldi orotan eta Generalitateari bidali beharreko dokumentazioa hobeto osatzeko, baina Tersako arduradunek ez dute egin.

Lege urraketa gehiago aipatzen ditu fiskaltzak bere txostenean. Legeak 2007tik erraustegia derrigortzen du zenbait kutsagarri berezi (NO2 oxido nitrosoa, CO karbonoa, SO2 sufre dioxidoa…) jarraian monitorizatzera, baina horien emaitzarik ez da aurkitu ikerketan.

Airenet elkarteak urteak daramatza salatzen Kataluniako errauste planta handiena den Sant Adrià de Besòsekoan gertatzen ari dena eta azkenean badirudi fiskaltzak urratsak eman dituela auzitegietatik gaia ikertzeko. Aipatu irregulartasunez gain, Airenet elkarteak salatua du Tersa erraustegiko arduradunek sistematikoki iruzur egiten ziotela ingurumen arautegiari. Adibidetzat aipatu dute 2018an gertatutakoa: urte hartan erraustegiaren isurien kontrola egiten ari zirela eta, labeetako tenperatura benetan 850 ºC-etara iristeko gas natural asko erre behar izan zuten –geroago urteko kontsumoen estatistiketan azaldu zen bezala– baina behaketa zorrotzagoa pasatu zenean, ohiko moduan funtzionatzera itzuli ziren.