Asteko laugarren langile hila, Bilbon, teilatutik erorita
Ostegun goizean hil da langilea, Bilboko José María Ugarteburu kalean. Astelehenean bi langile hil ziren, Andosillan (Nafarroa) eta Atxondon (Bizkaia), eta asteartean beste bat Amurrion (Araba).
Jaurlaritzaren Barne Sailak jakinarazi du istripu hilgarria. Bilboko José María Ugarteburu kalean langile bat hil da teilatu batetik behera erori ostean, bertan lanean ari zela, 10:00ak aldera.
Lau hildako aste honetan, 24 2025ean
Aste asaldagarria izanda lan istripu hilgarrien eremuan Euskal Herrian. Astelehenean langile bat hil zen Andosillan (Nafarroa), zama gainera erorita, eta beste bat Atxondon (Bizkaia), AHTren obretan ari zela pieza bat gainera erori ostean. Asteartean Amurrioko (Araba) Tubos Reunidos enpresako teilatutik erori eta bertan hil zen azpikontratatutako langile bat.
Aste honetako lau hildakoekin, oro har 24 dira 2025ean gaur arte laneko istripuetan hil diren langileak, LAB sindikatuaren kontaketaren arabera. Iaz 64koa izan zen heriotza kopurua.
