Asteazkenean eman genuen Eusko Jaurlaritzak hedabide batzuen artean egindako diru banaketaren berri. Denera bost milioi euro eman dizkie hainbat egunkari eta irratiri, COVID-19ak eragindako “lurrikara ekonomikoa” dela-eta, beste asko kanpoan utziz, ARGIA tartean. Vocento taldeko egunkariek (El Correo eta Diario Vasco) 2,4 milioi euro jasoko dituzte, Noticias taldekoek (Deia, Noticias de Gipuzkoa eta Noticias de Álava) 843.000 euro, Gara-k 305.000 euro eta Berria-k 290.427 euro; irratietan artean, SER kateak milioi erdia jaso du banaketa horretan. Diru publikoaren %93,4 gaztelaniazko hedabideentzat izan da.

Euskarazko kazetaritza independenteari babesa

Asko izan dira diru banaketa “bidegabearen” aurrean sare sozialetan kexa eta haserrea adierazi duten irakurle eta jarraitzaileak: “Lotsagarria” edo “auzolotsa” izan dira gehien erabili diren hitzak jendearen erantzunetan, beste askok elkartasun mezuak ere helarazi ditu.

Kazetaritza independentea eta ARGIAren proiektua babesteko diru ekarpena egin duten kide berrien artean ere ez dira gutxi Jaurlaritzaren jokabidea deitoratu eta “Euskal Herriko hedabide hurbileko eta txikiek, erakundeen aldetik jasotzen duten arreta eta bultzada eskasa” salatu dutenak.

Beste batzuek euskarazko kazetaritza eredu kritikoa goraipatu dute: “Asko baloratzen dut egiten duzuen lana. Kalitatezko edukiak, duzuen ikuspegi kritikoa, eta batez ere euskararekiko konpromisoa”, dio Getxoko lagun batek. Abadiñotik proiektua babestu duen beste lagun batek ARGIAren ekarpena nabarmendu du, “beste bide batzuk erakusten dituelako”, eta saretik elikatzen direnak ere badira: “Telegrametik asko jarraitzen dut eta Jaurlaritzaren laguntzen albisteak bultzatu nau kide egitera”, idatzi dute Tolosatik.

Euskarazko hedabideen sektorea babes eske

Jaurlaritzaren banaketa horren aurrean euskarazko hedabideen sektoreko eragileek kexa adierazi dute. Hala, Hekimen euskal hedabideen elkarteak eskatu du “gainerako euskarazko komunikabideei zabaltzeko”. Bere ustean “ulergaitza” da besteak kanpoan uztea: “Euskararen normalizazioaren ikuspegitik euskarazko komunikabideen lana ezinbestekoa den heinean, ezin dira COVID-19ak eragindako ondorioen aurrean babesik gabe utzi”. Tokikom tokiko hedabideen elkarteak ere eskatu du “sektore osoarentzako babesaren nondik norakoak” adostea.

ARGIAk bere komunitateari oharra zabaldu dio lantaldearen izenean, Jaurlaritzaren erabakiaz informatzeko: “Bistan da erabaki politiko horiekin eta baliabide publikoak erabiliz hedabide batzuk indartzen dituztela beste batzuen kalterako. Tamalez, ez da ezer berria. Ez da lehen aldia diru publikoaren banaketan ARGIA baztertzen dutena”. Horrelako egunetan inoiz baino ageriago geratzen da: kazetaritza independenteak jendearen babesa behar du ezinbestean. Eta areago, euskaraz informatuz gero.”