ARGIAk harremana zuen Red.media hedabidearekin, aurretik ere Redfishekin zuen bezala. Hartu eman horren ondorioz, beren bideoak euskaratzeko baimena eman ziguten eta gure irakurleentzat interesgarri ziren edukiak ekartzen genituen gurera. Beste norabidean ere, Red-ek hartu izan ditu ARGIAko edukiak eta Euskal Herriari lotutako edukiak argitaratzean, kontrasteak egiteko eta iturriak bilatzeko harreman periodistikoak ohikoak ziren. Ostiralean jakinarazi zuten hedabidearen itxiera.

"Alemaniako Gobernuak eta sionisten aldeko agendarekin lerrokatutako komunikabideek bultzatutako desprestigio eta errepresio kanpaina luze batek" behartuta hedabideari amaiera eman behar izan diotela salatu dute. Kanpaina hori areagotu egin da azken hilabeteetan.

2023an sortu zenetik, konpromiso antiinperialista, antikapitalista eta aurrerakoi argiak gidatu du proiektua. Alemaniako eta nazioarteko askotariko herri mugimenduei buruzko albisteak eta erreportajeak egin dituzte, fokua bidegabekeriatan jarrita. Red.mediaren aurkako kanpainaren oinarri nagusia Palestinarekiko elkartasun-mugimenduei egin dieten jarraipena eta dokumentazio zabala izan da. Alemaniako panorama mediatikoa oso zaila eta partziala da Israelen genozidioari dagokionez. Hedabide askok zalantzan jartzen ditu palestinarren testigantzak eta giza eskubideen aldeko erakundeen adierazpenak, hala nola Amnistia Internazionalarena edo NBErena. Salatu dutenez, Alemaniako hedabide ustez aurrerakoiek ere, Taz egunkariak, esaterako, ukatu egin izan dute Gazan genozidioa gertatu izana.

Errusiaren menpekoa?

Haien aurkako kanpainaren barruan leporatu dioten beste akusazio nagusia da Red.media errusiar interesen proxy-a izatea. Errusiari eta Ukrainako gerrari buruz Red.mediak duen jarrera argia dela azpimarratu dute: Errusia "bere interes geopolitikoek mugiarazten duten potentzia inperialista bat da, AEB, Txina, EB eta NATO bezalaxe". Red.mediak Ukrainaren inbasioa publikoki kritikatu izan du, eta gaineratu dute Errusiako oposizioaren buruen atxiloketen berri eman dutela eta argi adierazi izan dutela gerra bloke inperialisten arteko gatazka dela Ukrainakoa. Beraien babesa Ukrainan, Errusian eta mundu osoan "inperialismoari aurre egiten" dioten langileentzat dela argitu dute.

Desprestigio-kanpainak desinformazio-estrategia baten ondorio

Tagesspiegel egunkariko artikulu batekin hasi zen kanpaina 2024ko ekainean. Orduan egunkari horrek salatu zuen Red.media Redfishen jarraipena zela, 2022an zentsuratutako hedabide digitala zen eta 2023an, Redfisheko langileen multzo bat Red.mediara pasa zen. Langileen kontu horretan soilik oinarrituta, Red.media Kremlinen soldatapean egotea leporatu zioten. Espekulazio hori egiaztatu gabe, bere egin zuen orduko AEBetako Estatu idazkari Anthony Blinkenek, eta prentsaurreko publiko batean zehazki salatu zuen Red.media hedabidea.

Errusiarekiko loturen akusazioez gain, Red.mediari egozten diote Alemanian palestinarren aldeko protestak "sustatu" izana, Berlingo Humboldt Unibertsitatearen okupazioa, edo "terrorista palestinarrei" ahotsa ematea Ekialde Hurbileko politikari eta aktibista batzuk elkarrizketatzeagatik.

Blinkenek Tagesspiegel egunkariaren artikuluan jasotakoak errepikatu ostean YouTube, Instagram eta PayPal plataformetan haren kontuak blokeatu dizkietela salatu dute. Gainera, Red.mediako Hüseyin Dogru zuzendaria Europar Batasuneko zerrenda beltzean sarrarazi zuten 2025eko maiatzean, agintari errusiarrekin loturak edukitzea argudiatuta. Azken hilabeteetan, gainera, Red.media-k bere lantaldearen segurtasunaren aurkako mehatxu zuzenak jaso izana salatu du, baita lankide batzuen bizitzaren aurkako mehatxuak ere.

Alemanian disidentziaren aurka dagoen errepresioa testuinguru zabalagoan kokatu dute haren kontrako kanpaina hau, bereziki Palestinarekiko elkartasun adierazpenak jo-puntuan dituena. “Israelgo Estatuak 200 kazetari palestinar baino gehiago hil izanari garrantzia kendu diote edo justifikatu egin dute Alemaniako hainbat kazetarik”, diote. Alemaniako komunikabideen multzo batek kazetaritza alde batera utzi eta estatuaren boterearen hedapen gisa jardutea kritikatu dute. Bereziki Ukrainako gerra hasi zenetik eta, are gordinago, 2023ko urritik ahots kritikoak baztertu dituztela diote. Red.mediaren arabera, antisemitismoaren akusazioak Israeli egindako kritika oro kriminalizatzeko metodoa izaten jarraitzen du.

Gogoz kontra itxi dute hedabidea

Ofentsiba koordinatu horrek eragin zuzena izan du hedabidearen eraginkortasunean. "Errepresioa gero eta handiagoa denez, eta taldearen segurtasuna ezin dugunez bermatu, itxi egin behar izan dute hedabidea. Ez da gure borondatez hartutako erabakia izan", azpimarratu dute, eta "errepresioaren normalizazio globalaren" barruan kokatu dute, "genozidio baten aurka ahotsa altxatzea delitu bihurtzen duena".

Itxi arren, X eta Telegramen dituzten kanalak aktibo mantentzeko asmoa dute, boluntarioen lanaren bidez, haien eta beste ahots kritiko batzuen aurkako kriminalizazioa dokumentatzen jarraitzeko. Ixtera behartuta egon arren, ez dute porrot gisa hartzen: "Mundu osoko pertsonak informatzea, formatzea eta inspiratzea lortu dugu". Palestinan estatu demokratiko bakarra sortzeko eskaerari tinko eutsi, eta inperialismoaren, kolonialismoaren, apartheidaren eta zapalkuntza mota ororen aurkako borrokarekin jarraitzeko deia egiten dute.