ARGIA Durangoko Azokan: non, zer, noiz... ezer ez galtzeko gida

  • Asteazkenetik igandera bitarte Durangoko Azokak ateak irekita izango ditu, eta egun horietan ARGIAk, urtero bezala, bere txokoa izango du Landako gunean, baita Andra Mari elizapean ere. Hemen gure standetan aurkituko duzun guztia.


2022ko abenduaren 07an - 06:00
Azken eguneraketa: 08:46

Durangoko egunak hasi dira eta liburu, disko eta kultur sorkuntzaren zurrunbiloan sartuko da gustura herritar asko eta asko. Azokaren erreferentzia ezinbestekoa bihurtu da ARGIAren txokoa jende ugarirentzat, eta hedabide honek ere gustura hartuko ditu, gure komunikazio proiektua azaldu eta esku artean ditugun produktuez goza dezaten.

Aurten ARGIAren eta Bizi Baratzearen mahaiak Landako gunearen erdi-erdian izango dira: Artekaleko 19, 20, 21 eta 22 zenbakietan, informazio gunearen ondoan. Ohikoak bihurtu diren, letxuga, banbu-adar eta poltsak jarraituz ez duzu galbiderik izango. Gainera, Durangora gerturatu ezin duenak badu aukera nahi dituen produktuak etxera eramateko ARGIAren webguneko azokan.

2023ko agenda eta Sendabelar Baratzea

Bizi Baratzearen postuetan izango dira egunero Jakoba Errekondo eta Garbiñe Larrea liburuak sinatzen eta aholkuak ematen landare eta sendabelarren inguruan.

Ilargia eta Landareak 2023 agenda eskura dago jadanik, baratzean egin beharreko lanak azaltzen ditu astez aste Errekondok bertan, Antton Olariagaren marrazki ikusgarriekin; aurten baratzeko animalia laguntzaileak nabarmendu dituzte. Horrez gain, bisitariak esku eskura izango ditu beste hainbat produktu: Ilargiaren egutegia 2023, Etxeko Landareak, Bizi Baratzea...

Sendabelarrek Dakitena liburuaz azalpenak ematen ariko da Larrea beste mahai batean. Eta ARGIAren aurtengo nobedade nagusienetakoa den beste argitalpen bat aurkezten ere bai: Sendabelar Baratzea. Sendatzeko baratzea lantzeko proposamena egiten du urte osorako liburuxka honetan, horretarako 12 sendabelar aukeratuta. Gainera, hazi poltsak ere izango dira salgai nahi duenarentzat.

Inor ez da ilegala poltsak eta ARGIA liburuak

ARGIAk urteak daramatza eduki periodistikoz ondutako liburuak argitaratzen. Aurten Axier Lopez kazetariaren Gure heroiak liburua dugu protagonista, Elkanok munduari bira eman ziola 500. urteurrena ospatu denean, pertsonaia horren eta Euskal Herriko kolonialisten inguruko beste begirada bat proposatzen du Lopezek.

Horrez gain, beste hainbat liburu ere izango dira aukeran ARGIAren mahaian, baita Xapoketan karta-jokoa eta puzzlea edo Perretxiko zaindariak mahai jolasa ere, bestak beste.

Eta jakina, Inor ez da ilegala ekimeneko poltsak ere izango dira salgai, kolore guztietan. Jertseak eta kamixetak eskuratu nahi dituenarentzat, bestalde, alde zaharreko Andra Mari elizako aterpearen ondoan postua jarriko du ARGIAk egunero, Mbolo elkarteko kideekin elkarlanean. Nahi adina aukera izango du bertan.

ARGIAren proiektua azaltzeko informazio gunea

ARGIAren sostengu nagusia jendea da, bere komunitateak eusten du, herritarrek egiten duten diru-ekarpenari esker egin baitezakegu kazetaritza independentea. Komunikazio proiektuaren balioak eta harpidetza sistema berezia azaltzeko informazio gunea atondu du ARGIAk, kide egin eta proiektua babesteko abagune ederra beraz.

Azken astekariak, Larrun aldizkari monografikoak eta Gakoak publikazio mamitsua erakusgai jartzeaz gain, pantaila baten bidez gure webgunea, multimedia atala eta sare sozialen funtzionamendua ikusi ahal izango du gerturatzen denak.

Gainera, ARGIA Egutegia 2023 ere salgai izango da urtero bezala. Egunero efemeride bat eskaintzen duen takoa falta ezin den zerbait bihurtu da Euskal Herriko milaka sukaldetan.

Aurkezpenak eta solasaldiak

Jakoba Errekondo:

- Abenduak 10, 18:00etan: Ilargiaren egutegia

- Abenduak 11, 11:00etan: Ilargia eta landareak 2023, urteko lanen agenda

Garbiñe Larrea:

- Abenduak 11, 17:30ean: Sendabelar Baratzea


Kanal honetatik interesatuko zaizu: Durangoko Azoka 2022
2022-12-12 | ARGIA
“Aurreikuspenak beteta eta pozik” eman diote amaiera 57. Durangoko Azokari

Balorazio positiboa egun dute Durangoko Azokaren antolatzaileek: giroaz eta bisitari zein salmenta kopuruaz kontent agertu dira. Hurrengo azokari jarri diote data jada: 2023ko abenduaren 6tik 10era gauzatuko da 58. edizioa.


Durangoko Azoka. Bidaiko 5. eguna.
Ipuin batean bezala

Zer da zailagoa, irakurlea adi mantentzea 300 orrialdeko luzera daukan istorio bakarrean ala lauzpabost orrialdetan zerbait gogoangarria kontatzea? Nobela ala ipuina, ipuina ala nobela: hau irakurtzen duzunerako Durangoko Azokan irabazteko ezer gutxi geratzen denez,... [+]


Durangoko Azoka. Bidaiko 4. eguna.
Komiki-azoka ere bada Durangokoa

Komikia leku bila dabil Durangon, baina asuntua ez dago oso erraz. Bi problema nagusi ditu, nik uste: lehenbizikoa, genero gutxietsia izan dela, zenbaiten begietan bineta eta bunbuiloak irakurtzea kasik ez irakurtzearen pareko zerbait izateraino. Eta bigarrena, gure egoera... [+]


Neomak taldea
“Tradizionala dirudien zerbaitetik hasita, perreoan amaitzen dugu jende artean”

Kepa Junkerarekin panderojole aritu ziren sorginek ibilbide propioari ekin diote eta lehen diskoa aurkeztu dute Durangoko Azokan. Trikitixa eta panderoa alboratu gabe, gozoki gozoa gehitu diote Neomak sorkuntza-proiektuari: musika elektronikoa.


Durangoko Azoka. Bidaiko 3. eguna.
Pentsatzeko txokora: aurtengo zenbait saiakera

Garai nahasiak, tentsio soziala, krisi pertsonal eta kolektiboak, birpentsatzeko kontu asko: euskal liburugintza ez da bizi inguratzen duen gizartetik aparte. Horren isla izan liteke azken urteotan saiakerek eta, oro har, ez-fikziozko liburuek hartu duten protagonismoa. Mota... [+]


Eguneraketa berriak daude