"Aurreikuspenak beteta eta pozik" eman diote amaiera 57. Durangoko Azokari

  • Balorazio positiboa egun dute Durangoko Azokaren antolatzaileek: giroaz eta bisitari zein salmenta kopuruaz kontent agertu dira. Hurrengo azokari jarri diote data jada: 2023ko abenduaren 6tik 10era gauzatuko da 58. edizioa.

Argazkia: Durangoko Azoka

2022ko abenduaren 12an - 10:24
Azken eguneraketa: 11:58

Bi urtez ezohiko edizioak egin ostean, osasun-krisia heldu aurreko formatura eta salmenta zenbakietara bueltatu da Durangoko Azoka. Antolatzaileek 57. edizioaren azken egunean egindako balorazioa positiboa izan da, eta "aurreikuspenak beteta eta pozik" agertu dira. Egunotan jazotakoa "eztanda" gisa kalifikatu dute, bai bisitari eta salmentei zein giroari dagokionez. Eztanda hori, orain, Durangoz harago hedatzeko nahia agertu du antolakuntzak: "Bost egun hauetan bizitako eztanda hori herriz herri Euskal Herri osoan zehar zabaltzea da erronka, Azoka ez dadin oasi bat izan, Durangon sentitu dugun komunitate hau zabaltzen jarrai dezagun".

Abenduaren 7an eman zitzaion hasiera aurtengo Durangoko Azokari, eta abenduaren 11n itxi zituen ateak. Bost egun horiek guztiak jendetsuak izan direla azpimarratu dute, abenduaren 8a izanik jende gehien bildu zuen eguna. Hainbestekoa izan zen jendetza, diskoen aurkezpen guztietan edukiera bete zela. Zentzu horretan, Ahotseneak bere 15. urteurrena "giro ezin hobearekin ospatu du", antolatzaileen begietara.

Szenatoki arrakastatsua

Azpimarratzekoen artean, Szenatokia guneak izandako erantzun positiboa legoke. Izan ere, arte eszenikoen plaza izateko xedez sortutako espazioa beren "ibilbide imaginarioan" sartu dute azokako bisitariek. Horren adierazle da antolatutako 29 saioetatik hainbatetan edukiera bete izana. "Erabat finkatu da antzerki arinaren formatua", egin dute irakurketa. Aurrera begirakoan ere indartzen jarraituko dute Szenatokia, aurtengo sormen bekaren onuradunak gune horretan aurkeztuko baitu diruz-lagundutako proiektuaren emaitza, azokaren datorren urteko edizioan: Jon Ander Urresti aktore bermeotarraren Eucaliptus lana, hain zuzen ere.

Aurtengo edizioa, bestalde, urrats esanguratsua izan da COVID-19aren agerpenaren aurreko azoka eredua berreskuratzera bidean. Horren adierazle argia izan da internet bidezko salmenten beherakada: "Zalantzarik gabe, kulturzaleek aurrez aurreko Azokari lehentasuna eman diote online dendaren aldean". Lau egunetan 434 eskaera egin dira, guztira 1685 produktu izanik bidalitakoak. Eskaera gehienak Euskal Herritik egin dituzte, baina Katalunia, Galizia eta beste lurralde batzuetara ere egin dituzte bidalketak. Internet bidez erosketa egin dutenek aste honetan jasoko dute erositakoa etxean.

Motibazioz eta begirada aurrera begirako bidean jarrita eman diote itxiera 57. Durangoko Azokari. Izan ere, edizio nagusia atzean utzi arren, azokak herriz herri jarraituko du Zu non, han DA! ekimenaren eskutik. "Euskal Herriko 132 saltokitan Azokako literatur nobedadeak eskuratzeko aukera egongo da, eta aurten lehenengo aldiz sortzaileek ere euren liburuak aurkeztuko dituzte 45 liburu dendatan". Saltokien eta aurkezpenen zerrenda Durangoko Azokaren web-orrian aurkitu daiteke.

Hurrengo edizioari ere jarri diote data gaurdanik: 2023ko abenduaren 6tik 10era gauzatuko 58. Durangoko Azoka.


Kanal honetatik interesatuko zaizu: Durangoko Azoka 2022
Durangoko Azoka. Bidaiko 5. eguna.
Ipuin batean bezala

Zer da zailagoa, irakurlea adi mantentzea 300 orrialdeko luzera daukan istorio bakarrean ala lauzpabost orrialdetan zerbait gogoangarria kontatzea? Nobela ala ipuina, ipuina ala nobela: hau irakurtzen duzunerako Durangoko Azokan irabazteko ezer gutxi geratzen denez,... [+]


Durangoko Azoka. Bidaiko 4. eguna.
Komiki-azoka ere bada Durangokoa

Komikia leku bila dabil Durangon, baina asuntua ez dago oso erraz. Bi problema nagusi ditu, nik uste: lehenbizikoa, genero gutxietsia izan dela, zenbaiten begietan bineta eta bunbuiloak irakurtzea kasik ez irakurtzearen pareko zerbait izateraino. Eta bigarrena, gure egoera... [+]


Neomak taldea
"Tradizionala dirudien zerbaitetik hasita, perreoan amaitzen dugu jende artean"

Kepa Junkerarekin panderojole aritu ziren sorginek ibilbide propioari ekin diote eta lehen diskoa aurkeztu dute Durangoko Azokan. Trikitixa eta panderoa alboratu gabe, gozoki gozoa gehitu diote Neomak sorkuntza-proiektuari: musika elektronikoa.


Durangoko Azoka. Bidaiko 3. eguna.
Pentsatzeko txokora: aurtengo zenbait saiakera

Garai nahasiak, tentsio soziala, krisi pertsonal eta kolektiboak, birpentsatzeko kontu asko: euskal liburugintza ez da bizi inguratzen duen gizartetik aparte. Horren isla izan liteke azken urteotan saiakerek eta, oro har, ez-fikziozko liburuek hartu duten protagonismoa. Mota... [+]


Durangoko Azoka. Bidaiko 2. eguna.
Nor da Durangoko Azokako hiltzailea?

Gorpua hor zegoen ni iritsi naizenerako, benetan. Ez, ez, nik ez dut zerikusirik. Bai noski, kontatuko dizut dakidana, baina ez da asko: Landako guneko parkingean sartu, aparkatu eta parez pare aurkitu dut, bi autoren artean, patata-zaku bat bezala lurrean botata. Ez dirudi... [+]


Eguneraketa berriak daude