Lehenik, enpresak bi haize errotako zentral batentzako konexio baimena lortu zuen Hernaniko azpiestazioan, 10 MW potentziakoa. Iberdrolak konexio puntu bat esleitu zion Andoaingo lurretan eta hortik 10 kilometroko erradioaren barruan kokatu dezakete proiektua. Enpresak Amasa-Villabonan ezartzea hautatu zuen. Behin hau izanda “eskabidea” aurkeztu zuen Jaurlaritzan.

Jaurlaritzan eskabidea egin eta jarraian, enpresak 5 MW-eko bi haize errota ezartzeko proposamena helarazi zuen udalera. "Kontsulta urbanistiko bat egin zuten, batetik, eta bisita txartel bat utzi zuten, bestetik", Goikoetxeak zehaztu duenez.

Udala haize erroten kokapena, energiaren salmenta eta jabetza negoziatzen

Enpresak udalean egindako kontsulta urbanistikoan eta Jaurlaritzan egin zuen eskabidean poligonal bat aurkeztu zuen. Poligonalak lur hauek hartzen ditu: Amasamendia Herri Onurako Mendia zati gehienean, eta jabetza pribatuko zenbait partzela.

Goikoetxeak azaldu duenez, "kontsulta urbanistikoan bi partzelaren inguruko kontsulta zehatza egin zuten. Partzelak bi partikularrenak ziren, Amasako hainbat baserritatik oso hurbil kokatuta zeuden (500 metro baino gutxiagora), eta ohiko erabilera duen borda baten gainean". Udala harremanetan jarri zen enpresako ordezkariekin, "kokapen honekiko eta orohar proiektuarekiko kezka adierazteko".

"Enpresak proiektuaren kokapena eztabaidatzeko borondatea azaldu zuen", Goikoetxeak kontatu duenez: "Udal gobernu taldetik horretan jarri ginen eta bizigune guztietatik aparte dagoen kokapen bat adostu genuen ahoz. Orain kontsulta urbanistiko berria jaso dugu udalean. Udal teknikariek erantzun beharko dute kokapen horiek bateragarriak ote diren mota honetako proiektu batekin".

"Enpresak energiaren salmenta negoziatzeko borondatea azaldu du", gehitu du Goikoetxeak. Honen hitzetan, udalak energia salmentaz gain jabetzaren inguruko eztabaida emateko beharra azaldu dio enpresari. "Orain negoziaketa fasean gaude", baieztatu du zinegotziak.

Udalak herri kontsulta iragarri du

"Enpresak ulertzera eman du ez duela tramitazioaren hurrengo fasera (Aldez Aurreko Administrazio Baimena) joko udalaren onarpenik gabe, ez delako haien enpresa politika lurjabeen baimenik gabe proiektuen tramitazio nagusiak abiatzea", Goikoetxearen hitzetan. 

Zinegotziak zera iragarri du: "Amasa-Villabonako udal gobernuaren borondatea da behin proiektuaren nondik norakoak argitzen direnean, herritarrei informazio gardena ematea eta herri kontsulta bat egitea. Enpresarekin azken akordio bat badago, herri kontsultan erabakiko da Amasa-Villabonako Udalak lurrak uzten dizkion bere proiektu eolikoa garatzeko. Hori onartuko balitz, enpresak Jaurlaritzako tramitazio osoa egin beharko luke ondoren".

"Hau ez da legez araututako prozedura bat, borondate kontua da"

Goikoetxeak zehaztu du Amasa-Villabonan proiektuak daraman prozedura ez dela berez legeak arautu duena. "Prozedura hau Amasa-Villabonan aplikatu daiteke hainbat faktore ematen direlako: enpresaren borondatea negoziaketarako, udalaren borondatea negoziaketarako, eta udalak lurren jabetza izatea. Hau ez da legez araututako prozedura bat, borondate kontua izan da".

Iragan astean Villabonako zineman ikusi ahal izan zen Bizitza ez berriztagarriak filma. Emanaldiaren ondoren iritzi trukea sortu zen bertan zeudenen artean, eta Ander Goikoetxeak ere hartu zuen hitza. Udalen eskumenen inguruan, zera zehaztu nahi izan du: "Legez, udalek proiektuak baldintzatzeko duten eskumen nagusia alegazioak aurkeztea da, Jaurlaritzako tramitazioko fase gehienetan egin dezakete. Ondoren, azken fasean, udalak Hirigintza baimena eman beharko luke, proiektua udalerri bakarrean garatzen bada, baina hori teknikarien iritziaren araberakoa da, udal teknikarien aurkako erabakiren bat hartzea prebarikazioa litzateke eta hau argitu nahi dut eztabaidaren erdigunean kokatu izan delako".