ARGIA.eus

2021eko urriaren 18a
BESTELAKO ZINEMALDIA / 8. EGUNA

Alfonbraren azpian zegoena

  • Betirako gelditzeko itxura lukeen arren, amaitzen ari da Donostia Zinemaldia. Estreinatu dira dagoeneko film guztiak, eta hasia da epaimahaia sarien berri ematen. Batzuetan bat gatoz, besteetan ez horren beste; hor dago iritziaren koska. Agian homologazio eta lehia ez litzateke posible zinemari dagokionean. Dena dela, alfonbra gorriaren azpian zer dagoen ikusteko irrikaz nago. Akaso, garai batean bezala, harrien azpian hondarra dagoenarekin amets egin behar. Bestela, iazko hautsa. Zurriolatik ihes egindakoa, seguru.

Ainhoa Gutiérrez del Pozo
2021eko irailaren 25a
\"Kuartk Valley\" filmaren fotograma

Maider Oleagaren Kuartk Valley filma eskaini du Zinemira sailak. Kuartangon, Arabako 300 biztanleko aranean, westerna edo cowboyen filma gauzatu zuten orain urte batzuk. 2005. urtean elkartu ziren bertakoak diren Oier Martínez de Santos eta José Luis Murga amets hori betetzeko asmoz; 2014an estreinatu zen Algo más que morir, Almería Western Film Festival jaialdian, bi sari jasoz. Ia hamar urteko bidean, hainbat herritar konbentzitu zituzten filmeko pertsonaia izateko, eta diru eta ekipo teknikorik gabe garatu zuten proiektua. Larre baten gainean eraiki zuten cowboyen herrixka irudikatzen zuen eszenatokia, eta luzez iraun zuen bertan, filma amaituta ere. Urte batzuk beranduago, Oleagak ekimen horren berri eman du.

Gorabeheraz beteriko garaia irudikatzen du zuzendariak filmaren filma den honetan. Aktoreen esperientziak, tokian utzi diren aztarnak eta jatorrizko filmaren pasarteak tartekatzen dira irudietan, baita Oleagak proposatzen dituen eszenatoki berriak ere. Herrian proiektua zeinen sakon hartu zuten sentitzen da, eta hura aurrera eramateko izandako indar eta iraunkortasuna zizelkatzen da protagonisten jarreretan. Raccordari dagokionez, zenbait pasarte filmatu behar izan ziren berriro pertsonaien aldaketengatik (10 urterekin eta 14rekin oso ezberdina zen neskatoa edo aktore txarra izanagatik Sheriffaren ordezkatzea, adibidez), eta arazo teknikoei aurre egiteko, argitasun handiz jokatu zuten, etxeko eran. Azkenerako, pasadizo ezberdinen kontaketak eta zuzendariak eraikitako eszenaratzearen bitartez, herriak bizi izan zuen etapa horren argi-ilunak kontatzen dira. Westerna filmatzea egungoaren erregistrotik zeinen gertu egon daitekeen erakusten du, gainera, Oleagak.

 

"Heltzear" filmaren fotograma

Kimuak 2021 katalogoan, nahiz Zabaltegi-Tabakalera sailean izan da Mikel Gurrearen Heltzear filma. Veneziako jaialdiko Orizzonti sailean egon ostean, etxean estreinatu da, ikusmira handia sortuta. Filma 2000. urtean kokatzen da, euskal gatazkaren testuinguruan. Kanpoan duen anaiari gutun bat idazten dion bitartean, Sara, 15 urteko eskalatzailea, bere bizitzako maila-igoerarik handienerako prestatzen ari da. Haizea Osesek jokatzen du Sararen pertsonaia, eta 16mm-tan filmatua dago.

Irudi ederrak eta aktore-pertsonaia oso indartsua dauka Gurrearen filmak. Enkoadraketak gustu handiz aukeratuak dira, argi oso berezia lortzen da, eta ekintzek pisu handia dute istorioan. Off ahotsak Sarak anaiari idazten dion gutuna irakurtzen du, bere entrenamenduen eta bizitzaren berri emanez, eta irudiek bizitza hori erakusten dute eszenaraturik. Batzuetan, ordea, gutuna sinesgaitza gertatzen da. Irudien indarrak bere kabuz hitz egiten duenez, era berean, ez da beharrezkoa hitzaren presentzia erabatekoa; ilustraziora mugatzen da, irudia potentziatu ordez. Gatazkaren irudikapen berria izan litekeenak baino interes handiagoa sortzen du eskalatzailearen bizitzak. Estekikoki zoragarria den filma hankamotz gelditzen da argudioan.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Zinemaldia 2021

Zinemaldia 2021 kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude