Frankismo garaian hasi ziren Albertia Eguna ospatzen. Aurtengo ekitaldian, hain zuzen, oroimen historikoa izango dute oinarri, "euskal gatazkaren errelatua islatzeko tresna" dela esateko. Eusko Lurrak azaldu duenez, hainbat talde eta erakundek oroimen historikoaren izaera "kritiko eta erreibindikatiboa estali" nahi dute. Are gehiago, fundazio honen ustez "manipulazioa" dago atzean, Trantsizioan izandako "saldukeria zuritzeko" asmoz egina: "Ezker abertzaleko gudarien izaera iraultzailea, ezkertiarra eta soberanista, 'demokraziaz' eta 'elkarbizitzaz' hitz eginez estaltzen da", diote.

Albertia Egunaren antolatzaileen iritziz, duela 80 urteko EAE-ANVko milintateen ideologiak antza handia du gaur egungo beste borroka askorekin, eta oroimen historikoa borroka nazional eta sozial horientzako funtsezkoa dela iritzi dute.

Igandeko lehen ekitaldia tontorrean bertan izango da, Eusko Indarra batailoiak 1936ko neguan inguru hura hegazkin faxistengandik defendatu zuen toki berean. Ondoren Gazteluako hariztian ekitaldi politikoa egingo dute, 13:30ean eta herri bazkaria ere bai.