Covid-19aren krisiak pil-pilean jarri du diru publikoa non eta nola gastatzeari buruzko eztabaida. Erriberriko Oihua gazteen elkarteak gogorarazi du, beste urte batez Espainiako Estatuaren gastu handiena Nafarroan Abiadura Handiko Trenak eramango duela, 62,6 milioi euro inguru; proiektu osoak ordea 3.000 milioi euro beharko ditu gutxienez.

Nafarroako Erdialdeko herritarrak behin baino gehiagotan atera dira kalera AHTren proiektuaren aurka, oinarrizko trenbide azpiegiturarik gabe geratzeko arriskua dutelako. Aitzitik, oraingoan beste arrazoi bat nabarmendu nahi izan dute: porlanean gastatuko den dirua osasungintzara bideratzeko premia.

Pandemiak agerian utzi du osasungintza publiko indartsu bat edukitzeko inbertitu beharra, eta hain zuzen, hori eskatzeko elkarretaratuko dira Erriberriko plazan, larunbatean, arratsaldeko 17:00etan, Zuen AHTrako dirua, gure osasungintzarako! lelopean.