Hauteskunde kanpaina betean, konpromiso zehatza eskatu zieten Nafarroa eta Arabako AHTren kontrako eta tren sozialaren aldekoek alderdi politikoei joan den astean: “Uste dugu erabat eskandalagarria dela bi herrialdeotan ‘abiadura handiko’ 250 kilometroko trenbide berriak eraikitzea, orain dagoenaren paretik, lurraldea txikituz eta milaka milioi xahutuz”.

EH Bildu, Ahal Dugu, Ezkerra eta Equo jendaurrean agertu dira ostegun honetan Iruñeko Katakrak liburu-dendan, konpromiso hori publiko egiteko: “Hurrengo legegintzaldian gerta daitezkeen negoziazio guztietan eta balizko hitzarmenetan irmoki eutsiko diogu Nafarroako AHTren proiektu berriak gelditzeari eta bertan behera uzteari”, azaldu dute. Arabako kasuan, joan den astean gauza bera hitzeman zuten EH Bilduk eta Elkarrekin-Ahal Duguk. Era berean, tren soziala bultzatuko dutela agindu dute, “hirugarren erraila eta trenbide bikoitza inplementatuz”.

AHTren kontrako erakunde eta plataformek garrantzia handia eman diote konpromiso horri, abiadura handiko proiektuen eskumena Espainiako Estatuko gobernu zentralarena izanagatik ere, “aurrera eramatea zaila izango baita bertako instituzioen laguntzarik gabe”. Nolanahi ere, jendarteko sektore guztien inplikazioa ezinbesteko ikusi dute, lurraldeotako ekonomia eta ingurumena babesteko.