Asteazkenean sinatu nahi zuen Marotok geltokiari izena ezartzeko dekretua, baina oposizioko alderdiekin kontsentsua bilatu nahi duela adierazi du, eta erabakia hartu aurretik herritarren iritziari jaramon egin nahi diola.

Hala ere, Gasteizko alkateak gogorarazi du kale eta eraikinei izena jartzeko konpetentzia alkatetzari dagokiola, eta Adolfo Suarez izendapena egiteko nahiak bere horretan jarraitzen duela.

Iritzi-kidetasuna eta adostasuna oso garrantzitsuak direla esan du Marotok, baina “demokraziaren balioa” horren guztiaren gainetik dagoela. Suarez Espainiako Trantsizioa irudikatzen duen pertsonaia izanik errekonozimendua merezi duela esan du Gasteizko alkateak.

Autobus geltoki berria Lakuako Euskaltzaindia parkean ari dira eraikitzen. Azken egunotan herritarrek milaka sinadura bildu dituzte geltokiaren izena “martxoak 3”  izan dadin, 1976an poliziak, Suarez behin behineko buru zuela, hil zituen langileen omenez. Martxoaren 3ko biktimen elkarteak probokaziotzat jo zuen alkateak geltokiari Espainiako presidente ohiaren izena jarri nahi izatea.