Absolbitu dituzte Espainiako futbol selekzioaren zaleak jazartzea leporatu zieten Indar Gorriko kideak
2022ko urrian Iruñeko Sadar futbol zelaian jokatu zen Espainiako eta AEBetako emakumezkoen futbol selekzioen arteko partiduko zaleak iraintzea eta jazartzea leporatu zizkioten hainbat laguni. Epaiketa egin berri da eta akusatuak absolbitu ditu Iruñeko Zigor Arloko 2 zenbakiko Epaitegiak, tartean dira Indar Gorriko lau kide eta gasteiztar bat. Epaileak adierazi duenez, ez da nahikoa frogarik akusazioa egiaztatzeko.
Iruñeko Zigor arloko 2 zenbakiko Epaitegiak, absolbitu egin ditu 2022an Iruñeko Sadarren Espainia-AEB partida ikustera joan ziren zaleak hertsatzea egotzi dieten Indar Gorriko lau kide eta Gasteizko beste lagun bat. Epaileak “erabateko froga falta” dagoela ebatzi du; akusazioa egin duten pertsonen artean inor ez zelako Sadarrera partida ikustera joan, eta horietatik inork ez zuelako Espainiako selekzioaren kamiseta edo banderarik eraman.
Hala, Sadar futbol zelaiaren inguruan “desordena batzuk” izan zirela egiaztatu du epaileak. “Zenbait kasutan, kirol-ekitaldiaren segurtasunaz arduratu ziren polizien aurkako jokabide bortitzak izan ziren, ahoz eta fisikoki egindakoak, baina ez da horien aurkako akusaziorik jaso”, ohartarazi du.
Akusatuek epaiketan ukatu dute haien aurkako akusazioaren oinarri ia bakarra zen polizialen kontakizuna, eta adierazi dute leporatu zaien ekintza biolentoan ez zela zauriturik izan eta inork ez zuela horri buruzko salaketa formalik jarri. Fiskaltzak hiru urteko espetxe-zigorra eta bost urtez Sadarretik 600 metro baino gutxiagora joateko debekua eskatu zituen auzipetuentzat.
Epailearen hitzetan, ez da nahikoa froga izan leporatutako gertakariak egiaztatzeko.
