Sarek larunbateko ekintzen egitaraua aurkeztu du

  • Ekintzarik nagusiena arratsaldeko 17:30ean La Casillatik irtengo den manifestazioa izango da. Elkarrekin aurrera egiteko prest gaude izango da aurtengo leloa, eta hiru helburu zehatz edukiko ditu: giza eskubideak, konponbidea eta bakea.

Uriola.eus @uriolaeus
2018ko urtarrilaren 11

Urtebete igaro da jada Sarek deitutako iazko manifestazioan Bilboko kaleak bete zituztenetik. Ordutik, presoen egoerak berdin jarraitzen duela adierazi dute. Hala ere, bi alderdi azpimarratu dituzte: Iruñea eta Gasteizko parlamentuetan gertatutakoa. Bertan, espetxe politikaren aldaketa eta larriki gaixorik diren presoen askatasuna eskatzeko iniziatibak onartu ziren. Bertako alderdi politiko guztiek onartutako iniziatibak izan ziren, PP eta UPN izan ezik, horiek soilik geratu ziren indar metaketa horretatik kanpo.

Horrez gain, euskal sindikalgintzako eremu osoak ere bat egin du iniziatibarekin. Beraz, aurrerapauso garrantzitsuak eman direla adierazi dute gaurko deialdian. Bestalde, iparraldean gauzatu zen ETAren armagabetzea da Sarerentzako bigarren gertaera garrantzitsuena. Izan ere, gertaera hori iparraldeko alderdi guztien babesarekin lortu zen, eskuin zein ezkerreko alderdien laguntzarekin.

Hori dela eta, larunbat honetan burutuko duten manifestazioak ere, bide horretan lagundu behar duela adierazi dute. Gasteiz zein Iruñeko adostasunetatik abiatuz Paris eta Madrilen eragin ahal izateko ezinbesteko urratsatzat ikusten dute. Urrunketa politikaren ondorioak oso larriak direla esan dute. Euren senideak 40 minutuz bisitatu ahal izateko egiten dituzten kilometroak kontuan izanik, senideek munduari buelta eta erdi emateko aukera izango luketela aitortu dute (63.000 km inguru).

Espetxe politika honengatik, “motxiladun umeek” euren haurtzaro zein gaztaroa baldintzaturik dute, asteburuetan ehunka kilometro egin behar baitituzte aita, ama edo biak ordu jakin batez ikusi ahal izateko. Horregatik pasadan astean kolektibo hau manifestazioarekin bat egin zuen.

Larunbatean ozenki salatuko dute, espainiar estatuak zigorren batuketak ez aplikatzearren, beraien zigorra bete eta gero kartzelan jarraitzen duten presoak gehiago direla. Gogoan izango dute larriki gaixorik dauden presoak. Euren bizia lau horma horien artean galtzen ari diren presoak direla adirazi dute, gaixotasun sendaezinak izanik ere, kartzelan mantentzen dituztelako, beraien etxekoengandik urrun eta ia kasu guztietan artatzeko aukerarik ere eman gabe.

Beraien ustez, egoera hau urte betez mantentzea ezinezkoa da, arindu beharreko zama da. Horregatik, larunbatean Bilboko kaleak jendez betetzeko deia egin dute: “izan dadila urte bete gehiago, urte bat gutxiago geratzeko”. Leloa, lehen aipatu bezala, Elkarrekin aurrera egiteko prest gaude, izango da helburu zehatz baten baitan elkartutakoa: giza eskubideak, konponbidea eta bakea.

Saretik mobilizazio honen garrantzia azpimarratu du. Ahalegin kolektibo honek aurrera egiteko balio dezan nahi dute. Euren gotorlekuetan daudenak mugiarazteko, espainiar zein frantziar estatuei egoera honen amaiera exijitzeko, eta elkarbizitza baterantz abiatzea posible dela irudikatzeko. Helburutzat hori izanik, elkartzeko deialdia zabaldu dute eta egun horretan egingo diren ekintzak azaldu dituzte.

Egitaraua

Aurten badira zenbait berrikuntza: goizean goizetik ekintza desberdinak egongo dira; kulturalak, sozialak, musikalak, eta aldarrikapenez josiak.

11:00etan lehen deklarazioak La Bolsan.

11:30ean mahai ingurua izango da, La Bolsan: “gizarte zibilaren parte hartzea gatazka ezberdinen konponbidean”. Moderatzailea: Pili Kaltzada. Parte hartzaileak: David Fernandez, Catalunya; Mario H.Calixto, Colombia; Anaiz Funosa, Ipar Euskal Herria; Joseba Azkarraga, Sare.

Goizetik bestalde, Areatzako gunetik abiatu eta Bilboko alde zaharreko kaleetan zehar, txistulariak, trikitilariak, batukada eta SARE Kantari.

12:30.- Areatzako gunean, Porrotxen ikuskizuna egongo da. Umeentzako ikuskizuna izango da, eta emanaldiaren hasiera kartzelan dauden Xua, Haitz eta Izar txikientzako argazki herrikoi bat ateratzeko baliatuko dugu.

13:30.- Areatzan ere, Bertso saioa: Oihana Bartra; Miren Amuriza; Beñat Gaztelumendi eta Amets Arzallus bertsolariekin.

15:00.- Kepa Junkera eta Sorginak.

Uneoro Areatzan jateko eta edateko aukera emango dute. Ondoren, 16:30ak aldera La Casillarantz abiatuko dira, 17:30ean hasiera emango baitzaio manifestazioari. Eta amaitu bezain laster, Areatzan berriro ere bi kontzertuz gozatzeko aukera izango da: “Anita Parker” eta Tximeleta.

Manifestazioa 17:30ean hasiko da La Casillatik, ohiko ibilbidea egin ondoren Bilboko Udaletxean amaituko da.

Antolakuntzan 600 bolondres baino gehiago arituko dira. Aurreko urteetan bezala, diru laguntza biltzen petodun bolondresak egongo dira; petoak horiak eta Sareren logoa daramatenak izango dira, eta eramango dituzten poltsak beltzak, izendatuak, eta logo berbera dutenak izango dira. Jasotako diru laguntza mobilizazio honen gastuei aurre egiteko erabiliko dute.

Albistea hau Bilboko Uriolak argitaratu du eta CC-by-sa lizentziari esker ekarri dugu ARGIAra.


Euskal preso politikoak kanaletik interesatuko zaizu...
Graduz aldatzeko aukera ukatu dio Espainiako Auzitegi Nazionalak preso bati lehenengo aldiz

Auzitegi Nazionalak bigarren gradurako aldaketa ukatu dio Kordobako kartzelan preso dagoen pertsona bati, eta lehenengo graduan mantendu du.


500 lagun mobilizatu dira Donibane Lohitzune eta Baiona artean BAGOAZ kolektiboak deiturik

Ion Parot, Jakes Esnal, Xistor Haranburuk eta Unai Paroten espetxeratzea salatzeko, 500 lagun mobilizatu dira Donibane Lohitzune eta Baiona artean BAGOAZ kolektiboak deiturik. Lehen hirurek bizi osorako presondegi kondena dute Frantzian eta azkena 40 urtera kondenatu du Espainiak.


2018-04-17 | Urumeako Kronika
"Izugarri handitu dira abokatu eta mediku gastuak, eta ezin ditugu senideen esku utzi"

"Kinkea" egitasmoaren bigarren produktua jarri du salgai Etxerat elkarteak, presoen asistentzia juridikoa eta osasun asistentzia bermatzeko. Ostegunean aurkeztuko dute, 19:00etan Hernaniko Biteri kultur etxean.


2018-04-16 | ARGIA
Mikel Antza euskal presoa jipoitu dute Réauko kartzelan

Mikel Antza euskal preso donostiarra ingresatuta dago Réauko kartzelan beste preso batek “jipoitu” ostean. Ezkerreko besoko kubitua apurtuta eta betondoan zauria dituela jakinarazi dute gertukoek, Berriak jaso duenez.


2018-04-10 | ARGIA
BIDEOA | Sara Majarenasen ongi etorria jendetsua Intxaurrondon

Sara Majarenasi ongi etorria egin diote Donostiako Intxaurrondo auzoan. 13 urte egin ditu espetxean.


2018-04-09 | ARGIA
Sara Majarenas presoa aske atera da, espetxean 13 urte pasa ostean

13 urteko espetxealdia amaiturik, aske geratu da Sara Majarenas euskal preso politikoa. Haren izenak oihartzun handia eduki du iazko urtarrilean bi urteko alaba labankadaz bere aitak larriki zauritu ostean.


2018-04-06 | ARGIA
Beste bi euskal preso gerturatu ditu Frantziako Estatuak

Arkaitz Agirregabiria eta Iurgi Garitagoitia euskal preso politikoak Lannemezango espetxera lekualdatu dituzte, Etxeratek jakinarazi duenez. Agirregabiria Fresnesen zegoen preso, 930 kilometrora, eta Garitagoitia Poissyko espetxean, 950 kilometrora.


2018-04-05 | ARGIA
Andaluziako Puerto III espetxean hilabete bakarrean hiru preso hil direla salatu dute

APDHA Andaluziako Giza Eskubideen Aldeko Elkarteak ikerketa bat eskatu du Cadizko espetxeetan gertatzen ari diren heriotz ugariak direla eta. Lurralde hartan martxoan bakarrik lau pertsona hil dira espetxeetan, horietatik hiru Puerto de Santa Mariako Puerto III espetxe tristeki ezagunean, zeinetan galdu baitzuen bizia Xabier Rey preso iruindarrak.


2018-04-05 | Hala Bedi
Dispertsioak eragindako urteko hirugarren istripua salatu du Etxeratek hiriburuetan

Dispertsio politikak Ibon Goieaskoetxea euskal preso politikoaren senideen istripua eragin zuen Aste Santuan. Elkarretaratzeak egin ditu Etxerat Elkarteak hiriburuetan.


2018-04-04 | ARGIA
TattooArtean ekimena aurkeztu dute, espetxeen aurka eta euskal preso politikoen alde

Apirilaren 12, 13 eta 14an TattooArtean ekimena egingo dute Artean, Bizkaian. Bailara horretan bizi diren herritarrak ari dira antolatzen, jakinarazi dutenez, asanblada irekiaren bidez. "Egiten ari garen lana guztiz militante eta boluntarioa da, presoek kartzelan eta ihesean bizi duten egoera islatzera bideratuta dago dena, eta haiei elkartasuna era ezberdinetan adieraziko diegu". Lortuko den diru guztia euskal preso, iheslari eta errefuxiatuarentzat izango da.


Azkenak
EGILEA
Eguneraketa berriak daude