Urriaren 13tik geldirik zeuden Belartza Canterako (Mercadona eta Mc'Donaldsak egitea) obrak hasi dituzte gaur berriz. Hor eta Belartza 2 (nekazal lur direnetan 210.000 metro koadroko industrialdea egitea) proiektuetan egiten ari diren irregulartasunen kontrola Añorgako herritarrak eta naturzaleak egiten ari direla salatu dute.

Lau hilabeteko geldialdiaren ondoren, poligonoa eraikitzeko asmoa dagoen tokian berriz ere harrobiko materiala pilatzen ari dira. Ekologistek Donostiako Udala “irregulartasun askoren konplize” bihurtu dela diote eta Arartekoarengana joko dute.

90 bat añorgatar ingururen aurrean Belartza 2 proiektuari buruzko azalpenak eman ditu Enrique Ramos Hirigintza Zinegotziak, Donostiako Udaleko beste bi ordezkarirekin batera. Auzia esparru teknikora mugatzen saiatu den arren, añorgatarrek garbi utzi diote: “Auzia politikoa da, eta borondaterik baduzue, gelditu daiteke”.

Belartza industrialdean, “Añ-13.2 Cantera” delakoan, obrak gelditzeko agindua eman zieten asteazken arratsaldean langileei, Donostiako Udalak eskatuta. Mercadona berria bertan eraikitzeko asmoa dago. Naturkon Gipuzkoako Ekologista taldeen elkarteak hilabeteak daramatza irregulartasunak salatzen.

Gipuzkoako hamahiru talde natur zale biltzen dituen Naturkon plataformak Belartza-2 industrialdearen inguruko balorazioa egin du, “Udalak proiektua gauzatzeko duen interesa ikusita”, bertako lanak legez kanpokoak direla salatu eta egun gutxira.

Donostiako Añorga auzoko “Añ-13.2 Cantera” (Mercadona berria) obretan irregulartasunak salatu dituzte Ekologistak Martxan, Eguzki eta Haritzalde eragile ekologistek. Haien esanetan, baimenduriko eremutik at ari dira lanean, “legearen kontra eta garrantzi handiko balio naturalen kaltetan”.