Baina zer arraio da Tarara?

Argazkia: Dani Blanco

Sanfranen gaude, auzo eszena bat da eta kaleko zarata da nagusi. Aktore nagusia oso azkar ari da hizketan, orain mikrofonotik, orain mikrofonorik gabe. Rosa Teresa mintzo zaigu, batzuetan bere haurtzarotik, bestetan heldutasunetik. Biolina jotzen du, hori nahi zuela txikitatik eta osabak emango dizkio eskolak. Hala hasi da hain zuzen antzerki emanaldia, pianoaren laguntzaz, biolinaren musikarekin. Lehenengo eszena, bigarrena, hirugarrena… Iragarri egin dituzte, titulu eta guzti. Laugarrenerako apuntatzeari utzi diot. Kostatu zait sartzea. Informazio gehiegi dago oholtza gainean: zarata, oharrak, datak, gutunak, ahotsak… Gainditu nau. Jarri arreta, Iñi. Gero jakin dut ez naizela bakarra izan, lagunak ere kostata egon dira hasieran.

'Tarara' antzezlana
Hika kolektiboa
NOIZ: Otsailak 10
NON:  Principal Antzokia (Gasteiz)

Halako batean kantuan hasi da Jazmin. La tarara sí, la tarara no. Aire freskoa da Kepa Errastiren papera, ongi asko egiten dakienaren demostrazioa. Kantuan berriz Sanfraneko trabestia, horteroaren eta dotorearen arteko jantziak daramatza: Todos me dicen el negro, llorona… Azkoitieraz ari da atxabaltakua, eta jatorrizko bertsioan nongo azentuarekin egingo lukeen pentsatzen egon gara saio ostean. Guardia zibilak habanera kantatzeko eskatu dio? Itzultzaileen tarak.

Ikuskizuna aurrera joan ahala hasi dira matazaren hari-muturrak banan-banan askatzen: ama-alaba harremana, sute bat San Juan gauez, osaba Cristobal, gertakizun bat eta Schubert, Bachnet eta Txaikovskiren agerpenak dituen biolin-jotzailea. Nola sinetsiko dute irudimen handiegia duen haurraren egia? Emakume guztiek jasaten dute. Aita ez da inon ageri, baina oso presente dago. Ordenatu egin dira arrosa metalikoen azpian ikusi ditugun hamapiko eszenak. Emakume batek batzuetan egin beharrekoa egin behar du. Klak, argitu da misterioa.

Baina zer arraio da Tarara? Tarara herri-kantua da, abesti mota bat. Bemolez eta sostenituz betetako hiru silaba, ta-ra-ra. Tarara Jazmin da, edo Manuel. Sanfraneko prostituta, trabestia, marikoia. Tarara Rosaren laguna da. Ama bat. Tarara bortxa istorio bat da, jazarpenarena. Konplize eta konplizitate istorio bat.


Kanal honetatik interesatuko zaizu: Antzerkia
2024-05-29 | Reyes Ilintxeta
Estefanía de Paz Asín
Hildakoak erreskatatzera eta berpiztera etorri naizela sentitzen dut

"Garai batean, nire herrian, kateme guztiek Remigia izena zuten, kateme belaunaldi oso bat, Iruñeko ikuspegi panoramiko ederrenak konkistatu zituztenak”. Horrela hasten da Remigia Etxarren funanbulistaren bizitza kontatzen duen Argako erregina antzezlana... [+]


'Lurrez estali', laborarien errealitatea oholtzara eramango duen Axut! kolektiboaren obra berria

Izurako Latsaga zalditokian egingo dituzte emanaldi guztiak, hamar saio, maiatzaren 31tik ekainaren 16a bitartean. Ximun Fuchsek idatzitako obrak "ikuspegi integratzaile eta kolaboratiboa" du oinarrian, landa eremuko lurraldearen lekukotasunak bildu eta "tokiko... [+]


2024-05-13
Pastoral bat Iruñearendako

Herri-antzerki forma bat da pastorala. Sujet edo protagonista bat (hildakoa) hautatu eta bere bizia bertsotan ematen duena. Kantua ere presente dago emanaldian. Taula zuzendaria, taula gainean arituko diren arizaleak eta musikariak aritzen dira pastorala ematen den egunean... [+]


Eguneraketa berriak daude