ARGIA.eus

2020ko irailaren 25a

Soroskrazia

Asier Blas Mendoza @AxiBM
2016ko irailaren 11

George Soros, munduko pertsonarik aberatsenetako bat, finantza munduan espekulatuz aberastu zen. Horrez gain, ezaguna da neoliberalismoa eta Mendebaldeko sistema politiko, ekonomiko, kultural eta sozialaren supremazia moral eta materialaren ideiak hedatzen laguntzeagatik. Aspalditik globalizazioaren bertsio progrea finantzatu du mundu osoan, indar berezia jarriz herrialde sozialista ohietan eta herrialde soberanista-aurrerakoietan.

Sorosen helburua “gizarte irekiak” eraikitzea omen da. Ideologia honek  hiru ardatz nagusi ditu: neoliberalismo ekonomikoa, askatasun indibidualei errespetua eta “giza eskubideen” defentsa. Helburu horiek lortzeko, besteak beste, bi dira bere arma nagusiak: Human Rights Watch eta Open Society (OS). Lehenengoari 100 milioi dolar eman dizkio, bigarrena berriz, berak sortu duen fundazio handiena da. OSk pizgarri ekonomikoak edota karrera profesionalak eskaintzen dizkie elite desberdinei, horrela iparramerikar hegemonia politiko-kulturala hedatzen dute unibertsitateetan, hedabideetan eta gizarte zibilean.

Sinets iezadazue, ez da gustuko platera Open Society-ren etsaia izatea unibertsitatean, argitalpenak eta karrera akademikoa egin ahal izateko baliabide asko kontrolatzen dituzte, bereziki gizarte zientzietan, horiek gabe bidea urratzea zailagoa da, baina batez ere horiek zure kontrako boikot batean aktibatzen badira bizitza profesionala arriskuan izan dezakezu

Lan hau oraindik eta garrantzitsuagoa bilakatzen da kontrolatu nahi diren herrialdeetan. Jakina da “koloretako iraultzak” bezala ezagutu ziren estatu kolpe bigunetan OS fundazioak paper aktibo garrantzitsua izan zuela. Azken batean, Soros bere helburuak lortzeko estatu kolpeak babestu, giza eskubideen urraketak zokoratu eta gerrei estaldura ideologikoa emateko prest dago.

Berriki DCLeaks web orrialdeak OS fundazioari hackeaturiko 2.500 artxibotik gora atera ditu argitara. Horietan irakurri daiteke OSk Europar parlamenturako hauteskundeetan eragiteko planak jarri zituela martxan. Bestalde, artxiboen artean 2014ko Ukrainako estatu kolpeari buruzko europarren iritzia modelatzeko estrategia ageri da. Espainian, besteak beste, politikari, hedabide, kazetari eta akademikoak zerrendatzen dira kooptatzeko. Twitterreko iritzi sortzaileen zerrenda bat ageri da baita ere: alde batean, “ukrainar zale kritiko eta analistak” bezala izendatzen diren hamahiru helbide, eta beste aldean, “errusiar zale” bezala 49 ageri gara.

“Errusiar zaleen” artean gaudenok sentsibilitate askotariko jendea gara: Ukrainako krisiari buruz muturreko jarrera desberdinak dituzten pertsonak daude, gehi mota guztietako grisak. OSk darabilen agenda erradikalaren erakusle da: nire posizioak defendatzen ez badituzte, nire etsaiak dira. Eta sinets iezadazue ez dela gustuko platera OSren etsaia izatea unibertsitatean, argitalpenak eta karrera akademikoa egin ahal izateko baliabide asko kontrolatzen dituzte, bereziki gizarte zientzietan, horiek gabe bidea urratzea zailagoa da, baina, batez ere, horiek zure kontrako boikotean aktibatzen badira bizitza profesionala arriskuan izan dezakezu. Espainiako hedabide gehienek ondo dakite hori, ez da kasualitatea afera honen inguruan egon den isiltasun mediatikoa, nahiz eta ikuspegi demokratikotik eta kazetaritza ikuspegitik datuak eskandalizatzeko modukoak izan. Gerra korrespontsal gisa lan egiten duten kazetariek zein segurtasun gradurekin bueltatuko dira Ukrainara lan egitera?

George Sorosen “demokrazian” dirua duenak politika egiten du, lobby baten antzera presionatuz etxean eta atzerrian. Magnatea Hillary Clintonen finantzazio iturri nagusiena da. Ulertzekoa da, Wikileaks-ek filtratu duen artxibo batean jakin berri dugu Hillary Clintoni (estatu idazkaria zenean, kanpo harremanetarako ministroa) e-mail bat bidali ziola 2011n Albaniak bizi zuen krisi politikoa kudeatzeko argibideak ematen. Horrela da Soroskrazia, noizean behin Coca-Cola eta Pepsi artean bozkatzen uzten gaituzte, baina agindu betikoek egiten dute.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Iritzia  |  Faxismoa

Iritzia kanaletik interesatuko zaizu...

ASTEKARIA
2016ko irailaren 11
Azkenak
EGILEA
Argia buletina
Egunaren laburpena
zure e-postan
Eguneraketa berriak daude