Eskoletatik kanpo ere, nahi dute euskara biarriztarrek. Hala, ondoko leloa aukeratu dute aurtengorako: Bihar’hitz egin euskaraz. Euskara ikasia eta erabilia izan dadin astebeteko egitarau mardula antolatu dute. Irailaren 22an hasi ziren eta 28an bukatuko dute Mintza lasai astea. Hirugarren aldiz administrazioek eta elkarteek bat egin dute euskara bultzatzeko eta 70 ekitaldi antolatu dituzte. 25 elkarte ari dira lanean, eta 100 laguntzaile.

Denetariko ekitaldiak dira, olgetarakoak, gogoetarakoak eta heziketarakoak. Esate baterako dagoeneko sukaldaritza ikastaroa eta ardo dastaketa eskaini dituzte, baita Elkarteak eta euskara ikastaroa ere. Hilaren 26a, Hizkuntzen topaketa eguna izango da: Babel saihestu erakusketa, Biarritzen hitz egiten diren hainbat hizkuntzatako lehen hitzak irakasteko saioa, pilota partida bertsolari kontalaria han dela, eta ondoren, hizkuntzen zintzur bustitzea. Irailaren 27an bisita gidatua, Mintzaplaza, kantu poteoa eta kabaret afaria izango dituzte. Astea amaitzeko, 28an, Familien festa egingo dute.