ARGIA.eus

2020ko ekainaren 06a

Energiaren zero gunea Hernaniko Galarretan

  • Krisi garaian berrikuntza izan ohi da hura gainditzeko balio ziurrenetakoa. Hernaniko Galarretan sortu berri den Berrikuntza Gunean unibertsitatea, enpresa eta ikerkuntza uztartuko dituzte, jasangarritasun energetikoa oinarri hartuta.

Martin Vicioso @martinvicioso
2014ko maiatzaren 25a
Oronaren egoitza nagusia, Zero eraikina, zabaldu aurretik atonduta.  Hau izango da parkearen 
gune zentrala.
Oronaren egoitza nagusia, Zero eraikina, zabaldu aurretik atonduta. Hau izango da parkearen gune zentrala.

2010ean Miramongo teknologia parkea zabaltzeko erabakia hartu zuten, besteak beste, Gipuzkoako Diputazioak, Eusko Jaurlaritzak eta Oronak, Mondragon Unibertsitateak eta Ikerlan-IK4ek osatzen duten Ikasleku Fundazioak. Hernaniko Galarretan zegoen lur eremu bat zuen Orona igogailu egileak aspaldi buruan, eta hortxe kokatu dute energia ardatz izango duen teknologia parkea.
Galarretako gunean ikerkuntza eta garapenean (I+G) oinarritutako enpresa ekimenak bultzatuko dituzte, baina apustu garbiena jada abian da, Oronak sustatutako Berrikuntza Gunea edo Ideo-Innovation City. Berrikuntza teknologikoari lotutako lau ardatz jorratuko dira bertan. Hezkuntza, ikerketa, enpresa eta energia jasangarria uztartuko dituzte.
 

Eraikin nagusia, edo Zero eraikina, Oronaren egoitza zentrala izango da aurrerantzean. Bertako ikerketa lanak, beraz, enpresarekin berarekin lotuak izango dira. Mondragon Unibertsitateak ere fakultatea izango du, hiri mugikortasunean oinarritutako bi ingeniaritza gradu eta energia jasangarriei buruzko masterrak eskainiz. Ikerlan-IK4ren laborategietan, aldiz, elektrizitatearen biltegiratzearekin lotutakoak ikertuko dituzte. Izan ere, arlo horretan bat eginik aurrera egiteko akordioa sinatu dute Oronarekin. Azkenik, Galeria izeneko eraikina bisitariei eskainia da. Parke osoko energiaren monitorizazioa erakutsiko da, eta sistema energetiko berriztagarrien ekoizpena ikusi ahal izango da, museo baten antzera.

Eragile ekonomiko eta soziala

Buruntzaldean, Gipuzkoako beste hainbat tokitan bezala, industriak eragin handia izan du eskualdeko bilakaera ekonomikoan. XIX. mendeko eta, batez ere, XX. mendeko 50eko eta 60ko hamarkadetako industrializazioek bertako ekoizpena handitu zuten, eta Euskal Herriko gunerik oparoenetakoa izatera ailegatu zen.

Industriako langile kopurua handia izanik, gerora etorritako krisiek –70ko hamarkadakoa lehenik eta gaur egungoa ondoren– bereziki astindu zuten sektorea. Ondorioz, industriak eraberritzeko beharra izan du biziraupena ziurtatzeko, bereziki berrikuntza teknologikoetan oinarrituz. Testuinguru horretan uler daiteke Hernaniko Galarretako Zientzia eta Teknologia Parkearen balioa.

Proiektuaren aurkezpenean Hernaniko alkate Luis Intxauspek azpimarratu zuen krisi garaian gisa honetako proiektu gutxi abiatzen direla. “Trebakuntza altuko” 1.000 lanpostu inguru sortuko omen dira –horietatik 500 Ideo-Innovation Cityn–, berrikuntza teknologikoari lotutako beste enpresek ere Galarretan egoitza ezartzeko aukera edukiko baitute. Izan ere, Gipuzkoako Zientzia eta Teknologia Parkeak erakundeei alokatu ahal izateko eraikinak egingo ditu. Hortaz, Berrikuntza Gunearen helburua, I+G eta hezkuntza oinarri, eskualdeko eta lurraldeko eragile ekonomiko eta sozial indartsua izatea da. Unibertsitatearen, gizartearen eta enpresaren arteko topagune izan nahi du.

Teknologia Parkeak proiektuarekin koherentea den energia politika bultzako du. Sustatzaileek azaldu dutenez, eraikin guztiak beren behar energetikoak asetzeko gai izango dira. Halaber, azpimarratu dute energia modu jasangarri eta garbian ekoiztuko dutela (eguzki plakak, geotermia...). Dena den, ez dira soilik horretan geratuko. Berebiziko garrantzia eman diote energiaren kudeaketari, eta ikerketa lerro nagusietakoa izango da. Hortaz, parkearen beraren eraginkortasun energetikoa ikerkuntzarako aukera bilakatu dute.

Gunea ofizialki aurki estreinatuko den arren, jadanik martxan da. Esaterako, lehenengo promozioak 2013-2014 ikasturtean hasi ditu ikasketak energiaren ingeniaritzan eta ekoteknologiaren arloan.

Erradiografia

Hernani
Biztanleak: 19.481
Balio Erantsi Gordina sektoreka: Nekazaritza eta abeltzaintza (%0,4), industria eta energia (%43,2), eraikuntza (%14,6) eta zerbitzuak (%41,8).
Langabezia tasa: %14,6 (gizonen artean %13,8; emakumeen artean %15,8).
Industrian eta energian lan egiten dutenak:
1.622 lagun.
Euskararen ezagutza: %54,3
 

Galarretako Berrikuntza Gunea
Azalera: 40.000 m2 Berrikuntza Guneak (teknologia parkeak orotara 108.000 m2 izango ditu).
Inbertsioa: 70 milioi euro.
Lanpostuak: 500
 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Enpresak  |  Hernani

Enpresak kanaletik interesatuko zaizu...

ASTEKARIA
2014ko maiatzaren 25a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude