Zergatik puzten zaizu sabela arratsaldero?


Jabier Agirre
2014ko urtarrilaren 26a

Goizean goiz jaikitzean sabela estu eta lau-lauarekin esnatu arren, egunak aurrera egin ahala puzten hasten dela nabarituko duzu. Hiru emakumetik bati gertatzen zaio hori, baina arazoa konpondu daiteke.

Kasurik gehienetan, puztutakosabel hori ez da aparteko arazo baten adierazlea. Baldintza normaletan, sabel barruan 100 milimetro kubo gas egoten dira. Baina batzuetan kopuru hori handitu egiten da, eta pertsona batzuek likidoari eusteko duten joeragatik, eta bai odolak bai linfak gorputzean barrena zirkulatzeko eduki ditzaketen zailtasunengatik, eguna hasterakoan laua zen sabela puztu eta handitu egiten da.

Zeintzuk dira errudunak?

Sabel barruan gasak eta jariakinak pilatzeko arrazoi asko izan daiteke:

Proteina gehiegi hartzea. Animali jatorriko koipeek, haragi gorrietatik datozenek bereziki, digestioa zailtzen duten hondakin moduko substantzia asko sorrarazten dituzte. Horrek sabela puzten duten gasak pilatzea dakar. Baina lasai, hala ere. Ez utzi besterik gabe gantz horiek kontsumitzeari, gorputzak derrigorrean behar baititu zelula nekatu eta hondatuak konpondu eta berriak sortzeko. Horregatik, animali koipeen artean osasungarrienak bakarrik hartzea gomendatuko nizuke: haragi zuriak, arrainak, edo fruitu lehorrak, intxaurrak esaterako.

Edari karbonikoak eta afari pisu eta neketsuak. Batzuek nahiz besteek gasak eta hantura dituzte ondorio nagusi. Horregatik, eguneko azken otorduak arina izan behar luke, afaria ahalik eta koipe gutxienarekin egiten saiatuz.

Jan ondoren etzatea, eta  eserita denbora luzea ematea. Etzateak digestioa aldrebesten du, eta bigarrenak odol-irrigatzea eta zirkulazio linfatikoa moteltzen ditu. Horrek gorputzaren erdiko eta beheko partean likidoak pilatzea eragingo du.

Gorabehera hormonalak eta idorreria. Emakumeen kasuan, sabela gehiago puzten da hilekoaren aurreko egunetan eta menopausian. Baita gorputzean eginkariak “harrapatuta” daudenean ere. Egunero jogurtak hartzea oso lagungarri gertatuko zaizu, elikagai probiotikoa baita: jogurtaren bakterioek hesteetako floraren lana hobetzen dute.

Horrelakorik gerta ez dakizun

Gizarteak bere arauak ezartzen dizkigu. Aurreko atalean emandako ideiak argi eduki arren ere, sarritan ezinezkoa da gure bizimodua nahi genukeen bezain osasungarria izatea. Horregatik, erraz betetzeko moduko aholku sinple batzuk dauzkazu jarraian:

Gutxi jan. Egunean sei bat otordu egin, lasai eta denetik janez, elikagai talde bakar bat ere baztertu gabe, baina inolako abusu edo gehiegikeriarik gabe.

Murriztu gozoak eta gatza.  Egun osoko gatz kopuruak ez luke bost gramotik gorakoa izan behar. Haren ordez perrexila, kuminoa, tipulina, oreganoa eta halako espezieak eta belarrak erabil daitezke.

Hobetu ezazu oinez ibiltzean duzun jarrera. Makurtuta bazabiltza, abdomeneko muskuluak erlaxatu eta sabela puztuko da.

Hartu infusioak. Salbia-infusioak oso mesedegarriak dira sabela puzteko arrazoia bihotzerrea edo errefluxua denean. Te berdeak eta kamamilak digestioa bizkortzen dute.

Ez egin kirolik otorduen ostean. Ariketa fisikoak digestioa oztopatzen du, sabeleko astuntasuna eta hantura eragiteaz gain. Baina eragozpen hori ez da kirola egiteari uzteko aski arrazoi. Emaiozu hogei minutu egunean ariketa fisikoari eta zure gorputzak toxina gehiago eliminatu eta  jariakinak hobeto drainatuko ditu. Horrek sabeleko puzte sentsazioa gutxituko du, noski.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Medikuntza

Medikuntza kanaletik interesatuko zaizu...
ASTEKARIA
Azkenak
EGILEA
Eguneraketa berriak daude