Herriko musika taldeei jendaurrean jotzeko abagunea eskaintzea, ohikoak ez diren taldeak ikusteko aukera ematea eta eskaintza debaldekoa izatea. Horiek dira Jazpana Fest! bereizten dituen hiru funtsezko ezaugarriak. Nolanahi ere, hirugarren edizio honetarako musikaz harago, eskaintza zabala proposatu dute, “Zatozte ruralismo posmodernora!” aldarritik abiatuz. Kontzeptu umoristikoa da, Jazpanako komunikazio eta azpiegitura arduradun Mikel Alvarezen esanetan, ez ordea inozentea. “Jendartean oso hedatua dago Goierrin bertsolariak eta trikitilariak soilik daudela, baina hori ez da erreala. Noski hori ere badagoela, baina baita gauza gehiago ere!”. Horren adibide gisa aipatu du herrian dagoen graffitilarien maila. “13.000 biztanle dituen herri honetan kanpoko jende mordoa dago, eta hortaz, kultura asko nahasten dira”. Beraz, nahasketa horren erakusleiho izan nahi du Jazpanak, txikitik handira, herritik mundura, ruralismotik ikuskera posmodernora jauzi eginez, baina beti ere euskaraz: “Ni beasaindarra naiz, baina horregatik ez dut kultura eta ohitura tradizionaletara mugatu beharrik”.

Ikuskera horren isla da jaialdiaren beraren izena. Antolatzaileak haren nondik norakoen berri eman digu: “Garai batean Beasain eta inguruetako gazteak baserritik herriko plazara joaten ziren bertako musika taldeen doinu eta erritmoekin dantzatzera. Talde horiek jazz band izenez ezagutzen ziren, baina herri hizkuntzarekin jazpana bihurtu zen”. Antolatzaileetako batek hitz hori proposatu zuen jaialdia izendatzeko, eta Alvarezen aburuz oso egokia da jaialdiaren espiritua ondo islatzen duelako, “mundukoari erreferentzia egiten dio, baina era berean, euskarazko sonoritatea dauka”. Gainera, lehen bezala orain ere Jazpana kalera atera nahi dute eta inguruko gazteak jaialdiko taldeen doinuen erritmora dantza egitera gonbidatu.

Herrian horrelako ekimen baten beharra zegoela dio Alvarezek, jendea biltzeko eta inplikazioz elkarrekin lan egiteko balio duelako, besteak beste. “Beasain sozialki herri arraroa da, pertsona asko dago gauzak antolatzeko prest, baina oso sakabanatuta aritu izan dira orain arte, eta horregatik gauza txikiak soilik egin izan dituzte”. Horren adibidetzat ipini ditu urteetan gaztetxean edota Goieniz zineklubean egin den lana. Horri irtenbidea emateko eta Jazpanaren gisako jaialdi bat antolatzeko asmoz hurbildu zen orduko Beasaingo Gazteria zinegotzia herriko neska mutilak ibiltzen ziren lokaletara; interesa zutenak topatu eta jaialdiaren nondik norakoak marrazteari ekin zioten. Hastapenetan bost ziren, baina apurka-apurka zeregin zehatzetan parte hartzeko prestutasuna zuten herritarrak batu zitzaizkien. “Norberak dakiena ekartzen du eta ahal edo nahi duen neurrian laguntzen du”. Jaialdia antolatzeko lanak errazte aldera ardurak oso ongi zehaztuta eta banatuta dituzte: Mikel Alvarez berarekin batera, Diego Gomez eta Pablo Sanchez aritu dira musika taldeekin kontaktatzen eta skatea antolatzen; Igor Alustizak saskibaloi txapelketaren ardura hartu du; Garbiñe Irizarrek argazki rallyarena eta diseinuarena; Marta Faus aritu da webarekin, Ekain Mujika barra eta edariekin, Jon Artola administrazioan eta Idoia Guirado Beasaingo jaietan jartzen den Jazpana txosnaren lemazain. Gainera, jaialdiak irauten duen egunetan laurogei bat lagunek esku hartzen dute jaialdia aurrera ateratzeko. “Urtero laguntzeko prest zegoen jendea berbera zela ikusi eta boluntario sarea sortu dugu aurten”.

Udalarekin duten harremana ona dela baieztatu du Alvarezek. “Egitasmo alternatiboak antolatzeko laguntza gutxi ematea leporatu izan zaio betidanik Beasaingo Udalari, baina egia esan gu ezin gara kexatu”. Une honetan Udalak ekonomikoki laguntzen badu ere, beharrezko diruaren erdia baino gehiago elkarteak berak jartzen du. Izan ere, iaz Elkarte Kultural gisa erregistratu ziren, eta haren xedea Jazpana Fest! jaialdia antolatzeaz gain, Beasainen ekitaldi kulturalak sostengatu eta antolatzea da; irabaziak jaialdia bera ordaintzeko erabiltzen dituzte, baina iaz, esaterako, sos batzuk sobratu zitzaizkiela-eta erakusketa antolatu zuten argazki rallyan aurkezturiko irudiekin eta kontzertu akustiko xume bat ere muntatu zuten. Halaber, maiatzean gaztetxearekin elkarlanean Jazpana Gaua antolatu zuten. “Aurrera begira gauza gehiago egitea da gure nahia”. Jazpana ez da isilduko beraz eta garai batean bezala, Beasaingo herria girotuko du aurrerantzean ere.