ARGIA.eus

2020ko urriaren 01a

Lekuz kanpo, naturalenak

  • Natural Project ::Discontinuidad

    Autoekoizpena

    iraupena ::53´11´´

    prezioa ::10€

Iker Barandiaran @IkerBarandiara
2011ko apirilaren 17a
Natural Project
Andoaingo talde honen izena aspalditik zen ezaguna niretzat, baina orain dela gutxi entzun nituen beraien kantak aurrenekoz. Banekien Get In musika eragilearekin batera ur handietan sartzeko saiakera egin zutela edo hori uste nuen, baina ezagutu ditudanean jakin dut ez dituztela inoiz epe luzeko aurreikuspenak egiten. Are gehiago, esperientzia hark erakutsi die hobe daudela beren kabuz, sinesten dutenaren alde bakarrik borrokatzen. Azalean gaztelaniaz abestutako pop-rock malenkoniatsua ageri bada ere, berehala antzeman daiteke intentsitate, gordintasun eta erritmo askoz aberatsagoekin maisutasunez jokatzen dutela. Horrez gain, elektronikari ere etekina ateratzen diote, eta gai dira The Cure-n giroak uztartzeko indie-arekin, rockarekin, doinu industrialekin eta elektronika jostagarriarekin.
Natural Project
"Beti sentitu gara lekuz kanpo, baina ez gaitu gehiegi arduratzen"

Zuen abestien helburua zein da, komunikatzea, sentiaraztea, entzulearengan eragitea, dantzaraztea?

Abestien helburu nagusia sentimenduetan barrena bidaiaraztea da. Horretarako, ezinbestekoa da bidaia hori lehenik guk egitea. Gustatuko litzaiguke sentsazio hori entzuleekin konpartitzea, beraiek ere gure musika entzutean zerbait berezia senti dezaten. Eta horien artean, badira dantzarako aproposak ere izan daitezkeen kantak.

Zuen myspace-an diozue ez duzuela diskoetxeekin harremanik nahi. Zergatik?

Musika industrian gertatu ohi diren gorabeherak gertutik bizitzeko parada izan genuen. Musikaren gainetik beste hainbat interes egon ohi denez, guretzat garrantzizkoa dena bigarren mailan gelditzen zen. Orain disko hau gure kabuz egin dugu; gure esku egon dira lan honen prozesuaren nondik norako guztiak. Ezin diogu inori erantzukizunik eskatu, gu geu izan garelako erabateko arduradunak.

Gaztelaniaz abesten eta poperoegiak batzuentzat; musika komertziala entzuten dutenentzat gordinegiak; eta gainera Andoainen. Asko sinesten duzue egiten duzuen horretan…

Bai, arrazoia duzu. Beti sentitu gara lekuz kanpo. Hasieratik barneratuta daukagu hori eta ez gaitu gehiegi arduratzen. Hala ere, horrek ez du esan nahi jendeak egiten duguna baloratzen ez duenik. Arazoa da askotan kosta egiten dela gure musika jendearengana helaraztea, baina behin hori gertatu eta gero, jendeak asko baloratzen du egiten duguna; eta horrek izugarri pozten gaitu, berez lorpen ikaragarria delako.

Bada helmugarik gaur egungo musika taldeentzat?

Gure kasuan helmuga eta irteera-puntua berdinak dira. Guri musika egitea eta musikaz gozatzea gustatzen zaigu. Asmo horrekin hasi ginen eta urte mordoa pasa bada ere, berdin-berdin jarraitzen dugu, musika egiten jarduteak ematen digun guztiarengatik.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak

ASTEKARIA
2011ko apirilaren 17a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude