Hiru sindikatuaren afera ez da momentu onean etorri garraiolarientzat. Sektorea zuzenean jasaten ari da egungo krisiaren eragina –merkantzien errepideko garraioa %60 inguru jaitsi da– eta horri aurre egiteko lanean aritu beharrean, indarrak sindikatuaren biziraupena ziurtatzeko xahutzen ari dira Hirun: “Guk ez dugu, beste batzuek bezala, langile mordoa, eta horrelako kontu batek asko eragiten digu”, dio Estitxu Ugarte sindikatuko kideak.

Krisi batetik bestera

Kamioilari autonomoak gehiengoa dira garraioaren sektorean. Egitura atomizatu hori 80ko krisiari aurre egiteko sortu zen, baina orain beste krisi bati aurre egiteko erabat desegoki bihurtzen ari da. Izan ere, garraiolari askok beren kamioia erosteko kreditua ordaintzen ari dira, baina merkantzia gutxiago sortzen denez, txofer asko geldirik daude edo oso merke saldu behar izaten dute garraio zerbitzua. EAEko kamioien herena –3.000 inguru– geldirik dago momentu honetan. Bestalde, Fenadismer-ek, Espainiako Garraio Elkarteen Federazioak, emandako datuen arabera, 2008ko bigarren erdian 537 garraio enpresek ateak itxi zituzten EAEn eta Nafarroan.

Badirudi garraioaren sektorea berregituratze bortitz baten atarian dela. Azkeneko urteetan errepidezko garraioaren eskaria izugarri handitu da, baina krisiarekin batera maldan behera doa orain. Elkarte eta sindikatuak enpresentzako finantzazio bideak bilatzen ari dira egoerari aurre egiteko, eta administrazioei neurriak eskatu dizkiete autonomoei laguntzeko.