Abenduaren hasieran, hainbat emakumek sare sozialen bidez modu publikoan salatu zituzten Urretxindorra Ikastolako gizonezko irakasle batek urte luzez egin dituen erasoak. Horren aurrean, Ikastolen Elkarteak adierazi du kasua argitu bitartean irakasleak ez duela klaserik emango. Erantzun bat eman nahi izan dio ikastetxe horretako ikasle eta ikasle ohien talde batek, eta jo puntuan jarri dute Bilboko ikastolaren "jarrera konplizea".

30 urtez Urretxindorra Ikastolako irakaslea adin txikiko neskak “inpunitate handiz” sexualki erasotzen aritu dela salatu, eta kritikatu dute ikastetxea uneoro gertatu denaren jakitun izan dela eta estali egin duela. Salatzera ausartu izan diren ikasleak “mehatxatuak eta zigortuak” izan direla azpimarratu dute. “Engainuen bidez ikasleak isilarazten saiatu izan dira”.

Zuzendaritzaren mehatxuak

Azken adibidea egunotan izan dela adierazi dute oharrean. Ikasle ohiek sare sozialetan bizitakoaren berri eman ondoren, egungo zenbait ikaslek Urretxindorra Ikastolako zuzendaritzari kexa formala egin diotela azaldu dute, irakasle horren sexu abusuen biktima direla azaltzeko. Komunikatuan nabarmendu dutenez, zuzendaritzak gezurra esan zien, esanez duela hiru urte baino gehiagoko testigantzak ez direla baliozkoak, eta irakasle hori “pertsona gisa aldatu egin dela” argudiatuta.

Publiko ez egiteko ere eskatu zieten. “Ikastetxetik kanpo horren berri izan ez zezaten”, komunikatuan azaldu dutenez. Igandean Ikastolen Elkarteak protokoloa indarrean jarri duela esan bazuen ere, komunikatuaren bidez salatu dute ez dutela “ez legea ez protokoloa bete".

Urretxindorra ikastetxearen jarrera “estaltzailea” behin eta berriro errepikatu dela gaineratu dute. Ikasleek  irakasle horren aurkako sinadurak biltzeko asmoz pare bat gutun idatzi zituztela esan dute, baina horrekin aurrera jarraituz gero kanporatuko zituzten mehatxua egin zietela adierazi dute. “Gutun bat apurtzera behartu gintuzten”. 

Emakumeak ez, haurrak dira

Gizona erasotzaile hutsa izatetik haratago, “pederasta” dela azpimarratu dute oharrean, erasoak ez dizkielako emakumeei egin, haurrei baizik, 10 eta 17 urte bitarteko neskei. “Ez da emakumearen aurkako sexu indarkeria kasu bat, haurren aurkako sexu indarkeria kasu bat da”.

Horrek guztiak botere-egitura bat sortzen zuela adierazi dute, eta aldi berean, irakasleen eta ikasleen arteko desberdintasuna eta jazarpena sustatzen zituela. Ikasgelako "giro misoginoaren" ondorioa zen ikaskideek ere abusuak jasotzen zituen haur bera jazartzea, “inork aurre egin ezin zion irakasle baten begiradapean”.

30 urtez abusuak

Jakitun diren kasu larriena duela 25 urte gertatu zela azaldu dute mezuan. Irakaslea bere bideo-kamerarekin nesken aldagelan sartu eta haiek aldatzen ari ziren bitartean grabatu zituenean. Ziurtatu dute, zenbait gurasok ikastetxearengana jo zutela, baina ikastolak ez zuela ezer egin.

Horrez gain, irakaslearen izaera sexualeko jarrera eta iruzkinak etengabeak izan direla nabarmendu dute. Irakasgaiarekin zerikusirik ez zuten eta eszena sexualak zituzten filmak klasean jartzea, arropagatiko eta itxurarekiko komentarioak —“azterketa egunera leggings eta kamiseta arrosa horrekin etortzen bazara hamarra jarriko dizut”—, ikasle gogokoenak magalean eserita zituela biak maitemintzen ziren ipuinak asmatzea, behatza bendatuta zeukan neska bati “ea non ibili zaren behatza sartzen” esan zionekoa eta abar.

Salatzea

Oharraren amaieran, Urretxindorra Ikastolako ikasle eta ikasle ohiek dei egin diete biktima guztiei irakaslearen partetik jasandako gehiegikeriak kontatzeko eta idatz diezaieten eskatu dute.