Arratsaldean Moskuko agintariek prentsaurrean esan ostean Zelenski presidenteak herrialdea utzi eta Poloniara joan dela, hau gezurtatzera atera dira Ukrainako legebiltzarkideak.

Errusiaren informazioei aurre eginez, adierazi dute Zelenskik ez duela Poloniara ihes egin eta Kieven jarraitzen duela.

NATOko herrialdeetako atzerri ministroek bilkura izan dute gaur, eta Ukrainako gerraz mintzatu dira. Jens Stoltenberg idazkari orokorrak bilkura ostean egindako adierazpenetan esan du NATO "defentsarako" aliantza dela, eta parte diren estatuak salbu mantentzea dela bere egitekoa. "Ez gara gatazka honen parte, eta gehiagora joan ez dadin eta Ukraina gaindi ez dezan erantzukizuna gurea da".

Ukraina gaineko aire-espazioa ixteaz mintzatu badira ere, erabaki horrek Europan gerra zabaltzea ekarriko lukeela-eta baztertu dutela azaldu du Stoltenbergek. Era berean, adierazi du NATOren hegazkinak ez direla Ukrainako aire-espazioan sartuko, ezta topak Ukrainako lurraldean ere.

Viatxeslav Volodin Errusiako Dumako lehendakariak iragarri du Ukrainako presidente Zelenski Poloniara joan dela, Ukraina utzita.

Errusiako TASS berri agentziak konfirmatu du.

Errusiak Ukrainan egindako balizko giza eskubideen urraketak eta gerra krimenak ikertzeko komisioa eratuko du Nazio Batuen Giza Eskubideen Kontseiluak. Errusiar Federazioak eta Eritreak soilik bozkatu dute proposamenaren aurka, 13 herrialdek abstentzioa eman dute eta 32k baiezkoa.

Yurii Sheliazhenko Ukrainako Mugimendu Bakezaleko idazkari nagusi eta Kontzientzia Eragozpenerako Europako Bulegoko batzordekide da. Kieven dago, eta Errusia Ukrainako hiriburua hartzeko saiakera betean den bitartean egina da elkarrizketa hau. Kultura gerrazalea indartsu sumatzen den garaiotan, egoeraz egiten duen irakurketa bakezaleak apenas duen lekurik hedabideetan. Oso kritiko da Zelenski presidentearekin, baita Putinetin, NATOrekin eta AEBekin ere, militarismoan sakondu besterik ez dutela egiten, bere hitzetan.

Irakurri hemen osorik Democracy Now hedabideko Amy Goodmanek eta Juan Gonzálezek egindako elkarrizketa.

Ukraina hego-ekialdeko zentral nuklear handi baten kontrola eskuratu dute Errusiako indar militarrek, eskualdeko agintariek iragarri dutenez. The Guardianek eman du informazioa.

Goizeko ordu txikietan sua piztu da zentral nuklearrean, Errusiarren bonbardaketa baten ondorioz. Sua itzaltzea lortu dutela adierazi dute Ukrainako larrialdi zerbitzuek, eta erreaktore nuklearrak arriskuan ez daudela ziurtatu dute.

Zaporizhiako zentral nuklearra da Europako handiena eta munduko hamar handienetarikoa. Bere 6 erreaktoreekin sortzen du Ukrainak kontsumitzen duen argindar guztiaren laurdena, energia atomikoz ekoiztuaren erdia. Zenbait informazioren arabera, erreaktoreetako bi itzalita zeuzkan azken aldian.

Gonzalo Boye abokatuak Twitterren azaldu duenez, espioitza delitua leporatu diote Pablo González kazetari bizkaitarrari. Behin behinean kartzelan sartu dute. Otsailaren 28an atxilotu zuten, Ukrainako gerrari buruz informatzen ari zenean. 

Irakurri hemen albiste osoa.