ARGIA.eus

Itzulpen automatikoa / Machine translation

Txinak bake plana aurkeztu du eta AEBek armetan 500 milioi gehiago agindu dizkiote Zelenskyri

  • Txinak Ukrainaren eta Errusiaren arteko gerra eteteko bake plana aurkeztu du ostiral honetan, Errusiak Ukraina inbaditu zuela urtebete bete denean. Hemen biltzen dugu proposatu dituen hamabi puntuen laburpena.

Gaur goizean Bilbon egindako bilkura. (Argazkia: @CCOOeuskadi)

2023ko otsailaren 24an - 12:49

Bat, herrialde guztietako burujabetza errespetatzea, Nazio Batuen Erakundeak agintzen duen gisan. Bi, Gerra Hotzaren mentalitatea bertan behera uztea. Eskualde baten segurtasuna ezin da lortu bloke militarrak handitu eta indartuta. Hiru, erasoak bertan behera uztea. Gerrak eta gatazkak ez diote mesederik egiten elkarrizketari, eta alde guztiek lagundu behar dituzte Errusia eta Ukraina norabide berean lan egin dezaten eta elkarrizketa zuzenari lehenbailehen ekin diezaioten. Lau, bake elkarrizketak hasi behar dira. Bakea eta negoziazioa dira Ukrainako krisiak duen irtenbide bakarra.

Bost, krisi humanitarioari irtenbidea eman behar zaio. Zibilen segurtasuna eraginkortasunez babestu behar da eta korridore humanitarioak eratu behar dira zibilak gatazka-guneetatik ateratzeko. NBEri lagundu behar zaio lan hori koordinatu dezan. Sei, zibilak eta gerra presoak babestu behar dira. Batetik, gatazkan dauden alde biek nazioarteko araudia zorrotz bete behar dute, zibilei eraso ez egiteko; bestetik, Txinak gerra presoen trukatzea sostengatuko du. Zazpi, zentral nuklearren segurtasuna bermatu behar da. Zentral edo gune nuklearrei eraso egitearen aurka dago Txina eta alde guztiei nazioarteko araudia betetzea eskatzen die.

Zortzi, arrisku estrategikoak gutxitu behar dira, eta beraz, ez da erabili behar arma nuklearrik, eta ez da gerra nuklearrik egin behar. Bederatzi, laboreen esportazioak erraztu behar dira, eta alde guztiek bete behar dituzte horretarako Errusiak, Turkiak, Ukrainak eta NBEk sinatutako akordioa. Hamar, aldebakarreko zigor neurriak bertan behera uztea, horiek ezin baitute arazoa konpondu; Txinak bakarrik onartuko ditu NBEren Segurtasun Kontseiluak onartutako zigorrak. Hamaika, industria eta hornidura kateak mantendu behar dira. Alde guztiek egin behar diote uko munduko ekonomia tresna edo arma politiko gisa erabiltzeari. Hamabi, gatazkaren ondorengo berreraikuntza bultzatu behar da. Txina prest dago bere laguntza eskaintzeko.

Biden Ukrainan ezustean

Txinak bake prozesua bultzatzeko proposamena egin duen bitartean, joan den astelehenean AEBetako lehendakari Joe Bidenek ezusteko bidaia sekretua egin zuen Ukrainara Volodomir Zelensky lehendakariarekin biltzeko. Han, 500 milioi dolar gehiago agindu zizkion gerran laguntzeko, eta iragarri zuen aste honetan Errusiaren aurkako zigor ekonomiko gehiago ezarriko dituela. Ohartarazi zion Errusiari ez duela inoiz gerra hau irabaziko eta Ukrainari segurtatu zion AEBen sostengua izango duela “behar den denbora guztian”. Europar Batasuneko agintariek ere norabide berean hitz egin dute Ukraina sostengatzeari dagokionez. Oro har, Mendebaldeko indarrek Txinari egozten diote Errusiaren inbasioa ez gaitzetsi izana eta Errusia sostengatzea.

Printzipioz, Volodomir Zelensky-k ez du arbuiatu txinatarren planaz, baina ezta alde egin ere. Orain arte dauden posizio ofizialen arabera, Ukrainak ez du elkarrizketarik onartzen Errusiak Ukrainako lur guztietatik alde egin arte. Alde biak hildako kopuru handiak izaten ari dira gerran, eta gerra amaitu arte bajak zenbat diren jakitea gaitza izango bada ere, AEBen arabera bai Errusiak eta bai Ukrainak 100.000 soldadu inguru galdu dituzte dagoeneko gerran. NBEren arabera, hildako zibilak 8.000 inguru izan daitezke.

“Gerrarik ez” mobilizazioak Euskal Herrian

Ostiral honetarako, Gerraren aurkako mugimenduek hainbat mobilizazio deitu dituzte, besteak beste, euskal hiriburuetan, “Gerrarik ez, ez Ukrainan ez inon” goiburupean. Bilbon dagoeneko eguerdian egin dute bilkura Isozakiko eskaileretan; Donostian eta Iruñean arratsaldez egingo dituzte elkarretaratzeak, 19:00etan, hurrenez hurren Bulebarrean eta udaletxeko plazan. Gasteizen larunbatez bilduko dira Leizaola plazan 11.00etan.


Kanal honetatik interesatuko zaizu:: Ukrainako gerra
Ukrainako gerrak bi urte
Errusiaren eta NATOren arteko gerra Ukrainaren lepotik

Bi urte bete dira Errusiako armadak Ukrainan inbasioa hasi zuela. Egun hori baino lehenago, 2014ko estatu kolpean eta ondoren hasitako gerra zibilean 3.500 zibil inguruk bizitza galdu zuten; horiei gehitu behar zaizkie Nazio Batuen Erakundeak (NBE) azken bi urteotan zenbatu... [+]


2024-02-16 | Gedar
Ukrainari gerran laguntzeko entrenamendu-zentro bat sortuko du NATOk

Errusiaren aurkako gerran, Ukrainari laguntza ematen jarraitzen du NATOk. Aliatuak marka historikoak gainditzen ari dira "defentsari" loturiko gastuetan, "erabateko gerra" bati buruzko adierazpenak egiten ari diren bitartean.


Orain arteko preso trukaketa handiena egin dute Errusiak eta Ukrainak

230 ukrainar eta 248 errusiar askatu dituzte. Trukaketa Arabier Emirerri Batuek sustatutako akordio bati esker burutu da.


Eguneraketa berriak daude