Turismoan eragin itzela izaten ari da koronabirusaren krisia, baina turismoak berak ere elikatu du krisi hori urteetako "hipermugikortasunaren" ondorioz. Europa hegoaldeko 25 hiri turistiko biltzen dituen SET sareak –tartean dira Donostia eta Iruñea, baina baita Bartzelona, Lisboa edo Venezia ere– irakurketa bateratua plazaratu du COVID-19ak sorturiko egoeraren aurrean.

Sareak elkartasuna adierazi die krisiaren ondorioak jasaten ari diren sektore zaurgarriei, "desberdintasunak biderkatu egin diren une honetan".  Azaldu duenez, aspaldi ari dira salatzen ekonomia turistikoa "kostuak esternalizatzen dituen industria estraktibista" hutsa baizik ez dela eta orain agerian geratu da hori guztia, euren ustez.

Gentrifikazioak eta turistifikazioak auzoetako laguntza-sareak murriztu eta ahuldu dituela salatu dute, larrialdi egoeren aurrean "ezinbesteko tresna" direnak. Hala, oinarrizko zerbitzuak bermatzeko lanean dabiltzan pertsonei eskerrak eman dizkie SET sareak, besteak beste "komunitate harremanak bizirik mantentzen dituztenei" edota merkataritza txikiko langileei.

"Orain ikus dezakegu giza espeziea eta bere ingurunearen arteko neurrigabeko harremanak sortzen dituzten desoreka ekologikoek dakartzaten arrisku epidemikoa". Azken hilabeteetan kutsadura murriztu den arren, "aldi baterako hobekuntza" baino ez dela diote, eta aldaketa "iraunkor" bat nahi izanez gero "ezin dugu injustizia soziala eta larrialdi klimatikoa elikatzen segi".

Ekonomia birformulatzen: deshazkunde gehiago, etxebizitza turistiko gutxiago

Herritar guztiak eta oinarrizko zerbitzuak kontuan hartuko dituen ekonomia baten alde egin du sareak, "orekatua eta dibertsifikatua" izango dena eta "desazkundea ardatz" izago duena, bizitzarekin eta planetarekin "bateragarri". Horretarako proposamenak "behetik" egin behar direla uste dute.

Horri jarraiki, eremu turistikoan neurri sorta bat proposatu dute, "hegemonia turistikoa zuzendu" eta "trantsizio sozio-ekologikoa" egiteko.

Besteak beste, proposatzen dute turismoaren arloan ere desazkundea antolatzea, eta inolaz ere ez dadila sektorea zor publiko gehiagoren kontura erreskatatu. Euren esanetan, gastu publikoa gizartearen oinarrizko beharrizanetara bideratu beharko litzateke. Horrez gain, herritarrak higiezinen espekulazioaren aurrean babesteko, etxebizitza turistikoen kopurua "zeharo" murriztu beharko litzatekeela uste dute.

Turismoaren sektorearen irabaziak, bestalde, gizarte osoan birbanatu beharko lirateke, eta sektoren horretako lan prekarietatearen aurrean, kulturaren garapenarekin eta ingurumenarekin loturiko lanpostu duinak sortu beharko lirateke.

"Krisi hau gainditutzat ematen den unean, ohituta geunden normaltasunera ez itzultzeko, krisialdi hau gizarte justuago, parekideago eta solidarioago bat eratzeko baliatzea da gakoa. Horrela baino ez baita lortuko dena ondo joatea lortuko".