TTIPen aurkako milioitik gora sinadura, Junckerrentzako “oparia"
Jean-Claude Juncker Europako Batzordeko presidentearen urtebetetzean, oparia egin diote Stop TTIP europar herritar ekimenaren sustatzaileek: itun transatlantikoaren negoziazioak gelditzeko eskatzen duten milioi bat inguru sinadura.
Batzordeak ez du aintzat hartu ekimena. Halere aurrera egitea erabaki dute haren sustatzaileek, Michael Efler bozeramaileak azaldu duenez.
GUE/NGL (Europako Ezker Unitarioa/Iparreko Ezker Berdea) Europako Legebiltzarreko taldeak antolatutako “Stop TTIP, CETA, TISA” konferentzian esan du Europako Justizia Auzitegiari helegitea aurkeztuko dutela Batzordearen errefusaren aurka, baina ez direla epaileen erabakiaren zain egongo: ekimena aurrera eramango dute berdin, haren arauak betez.
Izan ere, 1.100.000 sinadura baino gehiago bildu dute honezkero, eta horiexek eskaini dizkiote fikziozko Juncker bati, “oparitan”.
GUE/NGLren konferentzian parte hartzen ari ziren dozenaka lagunek Europako Batzordearen egoitza ondorainoko bidea egin dute, protestan parte hartzeko.
