EAEko trans legearen erreforma onartu dute Eusko Legebiltzarrean, gehiengo zabalarekin. EAJ, PSE-EE, EH Bildu eta Elkarrekin Podemos-IU alde agertu dira, eta PP aurka. Azken aurreko izapidea gainditu ostean, Eusko Jaurlaritzako 75 legebiltzarkidetatik 68k babestuko dute erreforma datozen asteetako osoko bilkuran.

“Hainbat hobekuntza” txertatuko ditu legearen bigarren erreforma izango den honek. 2019an, lehen erreforman, pertsona transak ez zirela gaixo gisa tratatuko ezarri zen, eta ez zitzaiela eskatuko txosten psikiatrikorik haien identitatea egiaztatzeko.

Oraingoan, neurri berriak ezarriko dituzte osasun-arloan, hezkuntzan eta lan-eremuan. Transei arreta “integrala eta egokia” jasotzeko eskubidea bermatuko zaie, eta Osakidetzak haiek artatzeko zerbitzu espezifiko bat eskaini beharko du Araban, Gipuzkoan eta Bizkaian. Sei hilabeteko epea izango du adminisrtazioak zerbitzua txertatzeko, eta lehen mailakoa izango da. Kolektiboko adingabeei dagokienez, erabaki medikoak hartzeko aukera izango dute, baita entzunak izateko eskubidea ere.

Hezkuntzaren arloan, kide guztiei eskatuko zaie prestakuntza, eta diskriminazio protokoloak ezarriko dira. Uniformea erabiltzera derrigortuta dauden ikasleek eskubidea izango dute euren identitatearekin bat datorrena janzteko eta dokumentazio guztia horretara egokitzeko.

Lan-eremuan, berriz, abian jarriko dira diskriminazioaren aurkako planak, eta lan hitzarmenetan horren aurkako klausulak ezartzea proposatu du EH Bilduk. Halaber, hizkera aldatuko dute; Pertsona trans hitza ezarri dute, transexual edo transgeneroren ordez, inklusibitatea bultzatzeko.