ARGIA.eus

Itzulpen automatikoa / Machine translation

Topaketa Intergalaktikoetarako deia zabaldu dute agorrilerako

  • Joan den agorrilean, Hendaiako Kaneta portuan plantan eman zuen Aste Intergalaktikoa Euskal Herriko Amankomunak sareak, Notre-Dame-des-Landeseko (Bretaina) Ambazadako kolektiboak, G7koen kontragailurraren karietara. Aurten, ZAD edo BBG babestu beharreko gunera itzuliko dira Topaketa Intergalaktikoak. Agorrilaren 24tik 28ra iraganen dira, laugarren aldikoz, auzolanean eraiki Ambazadaren egoitzan berean. Munduan zehar galdan diren oldarraldiak izanen dituzte aipagai: horiek denek dituzten ezaugarri komunak aztertuko dituzte.

Artikulu hau egilearen baimenari esker ekarri dugu.

2020ko ekainaren 25an - 09:49
AmbaZADa iaz Hendaiako Kaneta portuan, G7aren kontragailurrean (Argazkia: Euskal Irratiak)

“2019a oparoa izan zen, hainbat kontinentetan sortu altxamendu eta herri mugimendu masiboei hurbiletik begiratzen badiegu: Aljeria, Hong Kong, Txile, Libano, Iran, Irak, Katalunia, Egipto, Ekuador, Sudan, Frantzia… Botereek borroka horiek guztiek konfinaturik nahi dituzte, baina AEBetan gertatzen ari denak katebegi berria jarri dio mugimenduari”, diote antolatzaileek bidali duten astearen aurkezpen laburrean. “Zer adierazten dute gertakari horiek eta haien arteko puntu komun ugariek?”. Hona topaketen karietara oldarraldi horien guzien aitzinean eginen den galdera; eta, galderatik, mugimendu hauetarik atera nahi diren irakaspenak: “Alderdi bakarren eta oligarkien zerbitzuko diren itxurako demokraziek osatutako estatu boterearen kritika, mugimenduak ez instituzionalizatzea, ekintza zuzenak, horizontaltasuna mantentzea eta liderrak ukatzea, taktika bateratzeak eta aniztasuna…”.

Azterketa urrunago eraman nahi dute jendarte autonomoak haztatu nahi dituzten antolatzaileek. “Gero eta maizago gertatzen diren altxamendu horiek nola akuilatzen dituzte autonomia saiakerak, elkarlaguntza, kapitalismotik edo beste despotismo batzuetatik urrundu nahi duten jendarte proiektuak?”. Hona landuko den ondoko galdera, beraz: “Itxuraz hain desberdinak diren egoeretatik abiatuta, zer helburu partekatzen ditugu mundu osoan eta zerk bultzatzen gaitu munduko karrikak eta landazabalak hartzera?”. Gogoeta horien eramateko eta zabaltzeko, aipatu matxinaden leku diren herrialde batzuetako ordezkariak gomitatu ditu Aste Intergalaktikoak lekukotasun ematera eta eztabaidatzera.

Chiapas, Bookchin, Rojava

Hausnarketa hauen baltsan egitearekin baliatu nahi dute kinka hauetarik ateratzeko bideen bilatzeko, elkarrekin. “Bizirik irauteko baldintza ezin jasanek (gerlak, goseteak, predazioak, ekozidioak…) trumilka jende basamortuetan eta itsasoetan barna botatzen dituztelarik, ondotik, heriotz kanpamentu batzuetara heltzeko, zer norabide, juntaleku eta ekintza eraiki ditzakegu denek elkarrekin etsimendu fatalistarekin hausteko, ikusle huts dauden gure gizarte hauetan?”. Galderek eta asmoek ez daukate erronka ttipia. Chiapasko esperientzia zohituak gerla egoeran eraman Kurdistango Rojavakoa gurutzatuko du, Murray Bookchin pentsalari estatubatuar zenaren munizipalismo libertarioak elikaturik. Hitzaldiak, eztabaidak, dokumental proiekzioak, apairuak, kontzertuak izanen dira egun horien osagai. Baita Ambazada eraikinaren obren jarraipena ere, auzolanean.

“Era berean, topaketa informalak eta askotarikoak egiteko aukera izango da, autogestio giroan, elkar ezagutzen eta antolatzen jarraitzeko. Konfinamenduaren biharamunean, itxaropena handitzeko!”, diote topaketen aurkezpenean. Aurten ere lagun franko joatekoak dira Euskal Herritik BBGra aste horren antolaketan eta gertakarietan parte hartzera, baita eremuko auzolanetan esku hartzera ere.

Ez da gertakari bakarra izanen Aste Intergalaktikoa Notre-Dame-des-Landeseko baserrialdean, BBGko biztanleek antolatu ZADenvies jaialdia iraganen baita segidan, agorril hondarrean. Aireportuaren egitasmo ehortziaren kontra altxatu ziren mugimenduetarik elkartu jendeak BBGko bizimolde alternatiboen segitzeko nahikaritik sortu gertakaria da ZADenvies. Erran bezala, aste barnean iraganen den Aste Intergalaktikoari jarraikiko zaio, agorrilaren 28, 29 eta 30eko asteburuan.


Kanal honetatik interesatuko zaizu: Antikapitalismoa
Kargurik gabe aske utzi dituzte Lurraren Altxamenduak sareko atxilotuak

Iazko abenduan hormigoi ekoizle den Lafarge lantegi batean burutu ekintza ekologistari lotua zen ekainaren 5eko sarekada. Kargurik eta kontrol judizialik gabe aske utzi dituzte atxilotu guziak.


Sainte Soline: erailtzeko prest lur-munto batengatik

Sainte-Solineko uraska inguruko gertakari lazgarriek galdera bat planteatzen dute: nola da posible 200 pertsona baino gehiago zauritzea (bi aldeetan) eta horietatik bik (manifestarien artekoetatik) hil ala biziko larrialdian jarraitzea zergatik eta segurtatzeagatik zulo bat... [+]


2023-01-29 | Aurélien Berlan
Gure beharren asetzea, geure gain

Aurélien Berlan filosofo eta baratzezainak denbora erdiz idatzi eta kurtsoak ematen ditu eta beste denbora erdia ‘bizirauteko lanetan’ ematen du, baratzean bezala etxean. 2021eko azaroan La Lenteur argitaletxe txikian plazaratu du ekologia politikoaren mundu... [+]


2023-01-16 | ARGIA
"Desalojo ilegalei ez" kanpaina aurkeztu dute hainbat kolektibok Bilbon

Azkenaldian Bilboko San Frantzisko auzoan desalojo ilegalak jazo direla salatuz eta errealitate horren aurrean antolakuntzara dei eginez, Desalojo ilegalei ez kanpaina abiatu dute hainbat kolektibok larunbatean. Juan Mari Aburto alkateak Plan Zubirik 2021-2025 aurkezteko auzora... [+]


Eguneraketa berriak daude