ARGIA.eus

2021eko otsailaren 28a

TaskRabbit: altzariak muntatzeko IKEAren azpikontrata berria

  • TaskRabbit aplikazioaren bitartez jatetxe, denda edo ekitaldietan ilarak egin ditzakete langileek. Gomendatutako tarifa orduko 9 eurotik gorakoa izanda baina IKEAko altzariak muntatzea da gehien eskatzen dutena bezeroek.

Ixone Arana
2021eko otsailaren 23a
Argazkia: TaskRabbiteko webgunea

TaskRabbit 2008an sortu zen Bostonen, baina Suediako konpainiak 2017an erosi zuen: nahiz eta marka eta konpainia independente gisa aritu, ez dira horrela. Azken urtean IKEA multinazionalean erositako altzariak muntatzea bihurtu da aplikazioaren jarduera nagusia. 

Aplikazioaren azpiegitura murritzak oso esanguratsuak dira, ez baitago mugikor zenbaki bat ere deitzeko. Bezeroarekiko arreta guztia aplikazioko chataren bidezkoa da eta Espainiako Estatuan ez dago langile bakar bat ere, Londrestik egiten dute lan. Hainbat bezerok esan duenez, IKEAko saltokian bertan egin dezakezu eskaera saltzailearen eskutik.

ElDiario.es-ek informatu duenez, IKEA/ TaskRabbit bezeroak ordaintzen duenaren %27-arekin geratzen da. Bezeroak 80 euro ordainduz gero, langileari 60 euro inguru heltzen zaizkio. Langileek “esperientziaren” arabera kobratzen dute, bakoitzak erabakitzen du aplikazioan hasberri ala aditu bezala jarri bere burua.

Langileen esperientzia

ElDiario.es komunikabideak hainbat esperientzia pertsonal bildu ditu. Danielen kasua aztergai (asmatutako izena), 27 urteko tasker langile gazte bat da, lanean hasi zenean erramintak ere ez zituen eta lagun batek utzi behar izan zizkion. Enpresak eskatzen duen bakarra autonomo ziurtagiria dela dio: “Autonomo ziurtagiria eskatzen dizute. Zure ordutegia jarri eta listo”. Danielek igo egin du bere esperientzia maila aplikazioan, “esperientzia pixka bat gehiago daukat, aditu-mailan jarri naiz. Horregatik gehiago ordaintzen didate”. Beti ez dutela bakarrik lan egiten dio, oso altzari handiak direnean bi langile bidaltzen dituzte lana egitera, ezezagunak: lan egiteko momentuan bertan batzen direla lehen aldiz azaldu du Danielek.

Bezeroen esperientzia

Olga, bere burua IKEAko bezero bezala aurkeztu duenak azaldu duenez, 80 urteko bere amarentzako egin zituen erosketak: “Muntatzaileak lau ordu eman zituen ohea soilik jartzen. Nola zihoan ikusteko deitu nuenean, armairua erabat apurtu zela eta mutilak alde egin zuela esan zidan amak. Aplikazioaren bidez deitu nion, eta TaskRabbiti abisua eman ziola eta itxaron egin behar nuela esan zidan”. Erreklamatzeko orduan, IKEAk guztia TaskRabbiten eskuetan utzi zuen. 

Beatrizek aldiz bere kasua sare-sozialen bidez zabaldu zuen. “Bi armairu, apal bat eta telebistako altzari bat erosi nituen. IKEAk zerbitzua eskaintzen zuen, beraz, profesionalei ordaintzea erabaki nuen. Ehun euro ziren”. (...) "Armairu bat muntatzen hasi ziren langilea ete bere semea. Lau ordu behar izan zituzten, baina lortu zuten. Bigarrena muntatzera joan ziren unean pieza bat puskatu zuten, ahal izan zuten moduan konpondu zutena". Enpresak mota guztietako frogak eskatu zizkion Beatrizi eta azkenean armairuaren dirua itzuli eta berriro muntatzeko aukera eman zioten, ez erabiltzea erabaki bazuen ere. 

Enpresa eta langileen arteko harremana

Enpresak bertako langileak independenteak direla baieztatzen du eta bakoitzak bere gaitasunak eta esperientzia zehazten dituzte. Enpresak ez ditu egiten diren lanak gainbegiratzen, baina 10.000 eurorainoko bermea du, bezeroak eta langileak arazoa elkarren artean konpondu ezin badute. Langileak egoera oso ezberdinetan daude, esperientzia gutxikoak eta ezinbestez lan egin behar dutenak edota beste negozio batzuk dituztenak baina bezero berrien bila dabiltzanak.

Glovo eta Deliverooren kasuak oso pilpilean daude gaur egun. Espainiako Auzitegi Gorenak ondorioztatu zuen Glovoren banatzaile bat autonomo faltsua zela. María José Landaburu UATAE autonomoen elkarteko idazkariaren ustez, plataformek "ondasunak eta zerbitzuak trukatzeko tresna" izan beharko lukete, eta horren bidez kopuru "sinbolikoa" kobratu. Autonomoak tarifak finkatzeko eta mandatuak baztertzeko askatasuna badu, ez luke arazorik egon behar. Ez dirudi TaskRabbit-en kasua hori denik, altzarien muntaketari dagokionez behintzat. "Itxura txarra du. Azkenean, IKEAren azpikontrata gisa funtzionatzen du", dio Landaburuk.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Prekarietatea

Prekarietatea kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude