Ostiral arratsaldean bilduko da UPNren zuzendaritza. Javier Esparza alderdiko lehendakariak diputatu aktak alderdiaren esku uztea eskatu die Adanerori eta Sayasi, eta bi diputatuek dagoeneko ezezkoarekin erantzun dute publikoki.

Esparzak dio ostegunean zehar bi diputatuek agindu ziotela baiezkoa bozkatuko zutela eta, azkenean, kontrakoa egin zutela, alderdiari iruzur eginez. UPNko lehendakariak diziplina neurri azkarrak hartu nahi ditu alderdia berriz ere bere kontrolpean hartzeko.

Miguel Sanz ere haserre

UPNko eta Nafarroako Gobernuko lehendakari ohia ere gogor mintzatu da bi diputatu matxinoen aurka, eta alderdiari kalte handia egin diotela deritzo, Diario de Navarra-ri emandako elkarrizketan: “UPNk ezin zuen bozkatu eragile ekonomikoek eta sozialek patronalarekin adostutakoaren erreformaren aurka, gainera PPren 2012ko erreforma hobetzen zuenean enplegagarritasunari begira”.

Sanzek argi ikusten du gertatutakoak Esparza kaltetzen duela: “Badakit Esparza ukituta dagoela afektiboki eta sentimentalki. Ahal dudan neurrian lagundu egingo diot”.

Ikusi beharko da noraino iristen diren ika-mikak ostiral arratsaldeko UPNren exekutiban, baina unerik beroena larunbaterako espero da, UPNren Kontseilu Politikoan. Organo hau da kongresu arteko alderdiko erabakigune gorena eta 232 kidek osatzen dute. Garcia Adanero eta Sayas kideak dira eta bertan egingo dute topo Esparzarekin.

Gobernura itzultzeko grina

UPNk ez du ezkutatzen boterera itzultzeko grina eta Javier Esparzak argi adierazten du horretan saiatuko direla 2023ko hauteskundeetan, horretarako PSNren aliantza bilatuz. Miguel Sanz presidente ohia da formula horren bultzagile nagusietakoa, eta orain ere ozen mintzatu da UPN eta PSNren konstituzionalismoaren itzulera bilatu beharraren alde. Argi adierazi du, halaber, Adanerok eta Sayasek Madrilen egindakoak norabide hori oztopatzen duela.

Legealdia ohi moduan agortzen bada urte eta erdi baino gutxiago geratzen da datozen udal eta foru hauteskundeetarako. Batek daki zer ekarriko duen Iruñeko Udalean osteguneko erreprobazioak, baina Enrique Maya alkatea ez du posizio politiko onean uzten, nahiz eta PSNren botoek bere aurrekontuak aurrera ateratzeko aukera eman dioten. Maya Esparzaren taldean aurkeztu zen azken kongresuan.

Argi samar dagoena da Navarra Suma formula (UPN, PP eta Ciudadanos) ez dela errepikatuko. Navarra Sumak iragan hauteskundeak irabazi zituen Nafarroan Legebiltzarrerako hauteskundeetan eta Iruñeko Udalean, baina ez zen gai izan foru gobernua eskuratzeko, eta Iruñeko Udalean sarri dabil arrastaka, bereziki PSN erakartzea lortzen ez duenean.

Legealdian zehar, halaber, erakutsi du hauteskundeetako nagusitasun horrek etengabe egiten duela PSNren gobernua sostengatzen duten Geroa Bai, Podemos eta EH Bilduren harresiaren aurka. Iruñeko Udalerako ituna urrats interesgarria zen UPN-PSNren korralito-aren konstituzionalismoa berrosatzeko bidean, baina Sayasek eta Adanerok zapuztu egin zuten eta orain UPN da barne egoera larrian harrapatua dagoena.

Labanak zorrotz

Larunbatean ikusiko da UPNren barne indarrak zertan diren eta kanpora begira Esparzak irudikatzen duen sendotasuna zertan geratzen den. Gaitza da pentsatzea Adanerok eta Sayasek horrelako urratsa haiek bakarrik eta beren kabuz eman dutela. Sayasek lehendakaritza lehiatu zion Esparzari 2020 ekainean egin zen XII. Kongresuan eta galdu egin zuen, baina ordezkaritza sendoa bilduz: Esparzak ordezkarien %58,29 sostengua bildu zuen eta Sayasek %41,7.

Ez da gutxiengo makala. Agian horregatik erantzun dio oilar Sayasek akta diputatua emateko eskaerari, esanez haiek UPNren batzorde exekutiboaren mandatua bete dutela: “Nire bizitza politikoan inoiz ez dut izan horren argi erabaki bat. Javier Esparzak ez badaki alderdi bat gidatzen, akaso berak utzi behar du lehendakaritza”.