Atentatuaren nolakotasunak direla eta, talde chavistak talde paramilitar bati egotzi dio hilketa: “Modus operandiak entrenamendu militarra jaso duen talde batek egin duela erakusten du, antza denez Kolonbiako paramilitarrek, Venezuelako polizia ohiek eta ohiko gaizkileek osatuta”, adierazi dute. Horrez gain, azken egunotan Autodefensas Colombo Venezolanas izeneko taldeak Venezuelako militarrei eraso egin diela salatu dute idatzian.

Krimena oraindik ez dago argi, baina inguruko “lur-jabe eskuindarrek ordaindutako mertzenarioek” egin dutela uste du talde chavistak, eta ahalik eta azkarren ikertzea eskatu du: “Ikerketa ahalik eta azkarren egitea eskatzen dugu, gertakizunak argitu eta egile material eta intelektualak zigortzeko. Gure makinaria judizialean konfiantza dugu, baina salaketaren eta mobilizazioaren bidezko borrokarekin jarraituko dugu halako hilketak zigorrik gabe geratu ez daitezen”, adierazi dute.

Hildako sei lagunak Corriente Revolucionaria Bolívar y Zamora eta Herri Defentsarako “Hugo Chávez” Brigadetako militanteak ziren. Herri Defentsarako Brigada hauek duela bi urte sortu zituen mugimendu chavistak, landa eremuan chavismoa defendatzeko. Garai horretan, eskuineko taldeen biolentzia handitzen ari zen, eta mugimendu chavistak “eraso faxista” horiei aurre egiteko herritarrez osatutako brigadak sortu zituen.