CCOO sindikatuak eman du jakitera albistea. Bengoaren langile ibilbidearen laburpena, honakoa:

Santi Bengoa 1955ean jaio zen Aramaion baina Otxandion bizi izan zen txikitatik. Lehen greba 1973an bizi izan zuen Elgoibarko Rodisa rodamentu lantegian, lan hitzarmena negoziatzeko komisio kide zela.

1974an Gasteizko Michelin lantegian hasi zen eta CCOO sindikatuan parte hartzen hasi zen. 1976an hainbat bider atxilotu zuten eta urte hartako langile borrokan parte hartu zuen nahiz eta berak lan egiten zuen enpresak ez zituen mobilizazioak babestu. Martxoaren 3ko hilketen biharamunean, Andres Linaresi lagundu zion luto egunaren testigantza grafikoak jasotzen, zeinak erabili diren gertakizun haiek dokumentatzeko.

1976an CCOO mugimendu izatetik sindikatu izatera pasa zeneko asanbladan parte hartu zuen, Bartzelonan. Ondoren, CCOO Euskadiren lehen kongresuan parte hartu zuen, 1978an Leioan. CCOO Euskadiko Kimika Federazioen Exekutibako hainbat kargu lortu zituen, 1988an idazkari nagusi izendatu zuten arte. 2000. urteko biltzarrera arte eutsi zion karguari.

Kargua uztean Sidenorrera itzuli zen, 2016an erretiroa hartu zuen arte.