CCOOk adierazi duenez, EAEko Auzitegi Nagusiak berretsi du Gipuzkoako aterpetxe publikoetako garbitzaileentzako Lan Eskaintza Publikoko (LEP) deialdiak langileen "berdintasun-baldintzetan sartzeko eskubidea urratu" duela. Epaiari jarraiki, "lanpostuak baldintza berberetan lortzeko eskubidea" urratzen du euskara eskakizunak. Hamabost lanposturi eragiten dien epaia da. 

Pasaden urteko urrian ezagutarazi zen Donostiako epaitegi baten ebazpena: Gipuzkoako aterpetxeetako garbitzaileei jarritako euskara eskakizunak "neurriz kanpokoak eta diskriminatzaileak" zirela. Horri erantzunez, Gipuzkoako Foru Aldundiak helegitea jarriko zuela iragarri zuen. Orduan, Aldundiko bozeramaile Irune Berasaluzek erakundearen jarreraren berri eman eta herritarren defentsan arituko zela adierazi zuen: "Gure egitekoa da eskaintzen ditugun zerbitzu publikoen erabiltzaileen hizkuntza eskubideak bermatzea, eta hori egiteko konpromisoa dugu, Gipuzkoako gizarteak eskatzen digun bezala". EAEko Auzitegi Nagusiak helegitea atzera bota du eta Donostiako epaitegiak hasieran emandako erabakian berretsi da.

CCOO, pozik 

CCOOk beste sindikatuen eta Foru Aldundiaren jarrera kritikatu ditu. "Penagarria da, LABek eta ELAk egin duten bezala, sindikatuek beraien lan eskubidea babesten saiatzen ari diren langileen kontra egitea". Bide beretik, Gipuzkoako Foru Aldundiaren jarrera kritikatu du eta zera esan helegitearen inguruan: "Lotsagarria da Foru Aldundia Jaurlaritzaren hizkuntza-araudia ez betetzera tematua egotea". Adierazi du Aldundiak "jarrera baztertzailea eta segregatzailea" duela euskaraz ez dakiten, ulertzen duten baina hitz egiten ez duten edo profila lortzen ez duten pertsonen aurka.