San Marko mankomunitateak Hernani, Oiartzun eta Usurbil diskriminatzen ditu, epaileek ebatzi dutenez
EAEko Auzitegi Gorenak baliogabetu egin ditu San Marko mankomunitatearen 2017ko aurrekontuak, Naiz.eus hedabideak berri eman duenez. Ez da lehen aldia, iaz jakin zen bezala 2014, 2015 eta 2016koak ere epaileek balio gabe utzi baitzituzten. Lau sententziak, beraz, arrazoi eman diete Usurbil, Hernani eta Oiartzungo Udalei San Marko mankomunitateak (EAJ eta PSEk kudeatzen dutenek) ekonomikoki zigortu egiten dituela eta aurkezturiko helegiteei. Nabarmena da hondakinen kudeaketan ondoen ari direnak diskriminatzen dituela San Markok, Gipuzkoako erraustegi berriaren bultzatzaile handienak.
2018ko apirilean ARGIAk plazaratu zuenez, Hernani, Oiartzun eta Usurbilgo udalek urtez urte auzitara jo behar izan dute San Marko honek, EAJ eta PSEko hautetsiek kontrolatzen duten zuzendaritzarekin, bere aurrekontuetan kaltetzen dituelako gaikako bilketa egoki egiten ez duten herriak eta hauek ekonomia zirkularraren alde aspalditik eginda daukaten hautua. Oiartzungo alkateorde Eneritz Arbelaitzek orduan esan zuenez, justu alderantzizkoa bultzatu behar da: “Ezinbestekoa da ondo egiten ari direnak saritzea eta gaizki egiten ari direnak zigortzea, saritu ala zigortu, baita ekonomikoki ere”.
Orduan hiru udalerrietako agintariak baloratzen ari baldin baziren auzitegiei haiei arrazoi eman eta baliogabetu izana San Marko mankomunitatearen 2014, 2015 eta 2016ko aurrekontuak, orain jakin berri da 2017ko aurrekontuak deusetan geratu direla. Hernani, Oiartzun eta Usurbilen hondakinen atez ateko bilketa dago indarrean, eta halere, San Markoko agintariek haiei ere kobratzen dizkie mankomunitateko gainerako udaletan hondakin organikoak jasotzeko erabiltzen dituzten edukiontzien erosketa eta mantenimendu gastuak. Inon ez bezala, mankomunitateak ez die laguntzen ondoen ari diren udalei beren lana hobeto egiten eta, aldiz, okerrago egiten duten udalen gastuak ere haiek partekatu arazten die.
Mattin Aldaia eta Koro Etxeberria Hernaniko zinegotziek (EHBildu) Naizi esan diotenez, 2017an San Markoko agintariek amarru bat asmatu eta bostgarren edukiontziengatik fakturak bidaltzea etenda, garbiguneen erabileragatik kobratu zieten... baina hiru udaloi bakarrik, ez gainerako besteei. Horixe da orain EAEko Auzitegi Gorenak legez kanpokotzat jo eta 2017ko aurrekontuak baliorik gabe utzi dituen erabakia.
San Marko atez ateko herriei egiten ari zaien presio ekonomikoa handia da, zinegotziok salatu zutenez. Hernaniri ezarritako zigorraren kopuru bat azaldu zuten: 2017an gehiegi zenbat kobratu zitzaien oraindik kalkulatu gabe dagoen arren, soilik 2014, 2015 eta 2016an San Markok legezkoa baino 91.797,41 euro gehiago kobratu zion Hernaniri.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
