Gasteizko Salburuako institutuko irakasleek protesta egin dute Pradalesen bisitan
Institutuko giza baliabideak hobetzeko eskatu dute irakasleek, ikasleei kalitatezko arreta eman ahal izateko. Kartelekin eta pankartekin itxaron diete irakasleek lehendakariari. Jaurlaritzako ordezkariek ikastetxeko zuzendaritzari esan diote ez zutela "horrelakorik espero" eta "lotsagarria" dela.
Gasteizko Salburua BHI institutua inauguratu du astelehen honetan Eusko Jaurlaritzako ordezkaritza batek, Imanol Pradales lehendakaria buru, Begoña Pedrosa Hezkuntza sailburua ere aldean zuela. Ikasturte honetan zabaldu ditu ateak institutu horrek. Jaurlaritzaren bisita, beraien prentsa-oharraren arabera, "Euskadin hezkuntza-hobekuntza eta kalitatearen mesedetan hezkuntza-espazioak eraldatzeko gauzatua dagoen estrategiaren baitan" egin da.
"Borroka dinamika batean gaude, hainbat errebindikazio egiten", jakinarazi dio ARGIAri bertako irakasle Patrik Jimbertek. Ez zuten normaltasun itxurarik eman nahi, eta horregatik prestatu dituzte kartelak eta pankartak ordezkari politikoen etorreran. Ez dute interakziorik izan, baina Jaurlaritzako ordezkarien aurpegiak "koadro bat" izan direla esan du Jimbertek. Hasieran "harriduraz", beraien artean txutxu-mutxuka aritu direla esan du. Gero, "ez genuen espero" eta "lotsagarria da" esan dio ordezkari politiko batek zuzendaritzako kide bati.
Halako protesta edo aldarri unerik ez da ageri Jaurlaritzak zabaldutako notizian. Institutua inauguratzeko, ikasleekin hitz batzuk patioan lurperatu ditu Pradalesek –hogei urte barru aterako dituzte bertatik–, eta ondoren ikastetxeko areto batean eman du hitzaldia lehendakariak. Bideoan, hitz onak esaten eta bertako hezkuntza komunitateari eskerrak ematen ageri da, bestelakorik gertatu ez balitz bezala. Jimbertek ARGIAri esan dio areto horretara sartzeko gonbidapenik ez zutela ez irakasleek eta ez ikasleek; soilik zuzendaritzako kideak zeuden bertan.
Irakasleen aldarrikapenak
"Batez ere giza baliabide gehiago eskatzen ditugu, ikasleen beharrak ase daitezen", dio Jimbertek. Ikastetxe horretan, aipaturiko iturriaren esanetan, gero eta ikasle gehiago daude arazo psikologikoak edota behar bereziak dituztenak, "baina irakasleak ez gaude prestatuta; ez daukagu espezialistarik". Horrez gain, behin ikasturtea hasita etorritako bi ikasle ere badituzte ikastetxean, eta berez badago Jaurlaritzaren programa bat haiei hizkuntza-formakuntza ematea bermatzen duena, baina ez dira legeak ezartzen duen gutxieneko ikasle kopurura heltzen, eta, Jimberten esanetan, eskubide hori ez zaie bermatzen ari.
Bestalde, digitalizazio prozesu batean murgilduta daudela adierazi du institutuko irakasleak, Jaurlaritzak aginduta, irakasleekin eta hezkuntza komunitatearekin kontrastatu gabe, "pedagogikoki ere gailu digitalekiko harremana murrizten ari den garaiotan". Burokratizazio lan handiaz eta erakundeen jarrera unilateralaz ere egin dute protesta.
Esaterako, institutuaren eraikinaren adibidea ipini du Jimbertek: "1980ko hamarkadako kondizio irizpideei jarraituta eraiki berria da eraikina, uda ostean zabaldu zen. Eredu pedagogikoa asko aldatu da 1980tik, eta, aldiz, eraikuntzak segitzen du lehengokoen gisakoa izaten. Halaxe eraiki dute auzokideekin, ikasleekin, irakasleekin eta gurasoekin konpartitu gabe".
Eraikinak kanpotik itxura ona duen arren, barruko hainbat espazio ez daude oraindik egokituta, Jimberten esanetan. DBHko lehen mailako ikasleak hartu dituzte ikasturte honetan, sei ikasgela dira guztira, eta haien atzetik etorriko dira hurrengo urtean adin berekoak, horrela, urtez urte, institutuko lerro guztiak osatu arte.
Palestinan gertatzen ari diren gizadiaren aurkako krimenak “berariaz gaitzesten ez dituzten” Israelgo erakundeekin harremanik ez izateko 2024ko apirilean EHUko Gobernu Kontseiluak hartu zuen konpromisoaz gain, beste urrats bat eman du euskal unibertsitate publikoak... [+]
Orain arte ez dugu aipatu, baina bada 6-12 urte arteko umeen kirol jarduerari –aisialdiari, oro har– lotuta dagoen eta azpimarratzea merezi duen beste osagai bat: hizkuntza erabilera. Zentzu horretan, euskararen arnasgune dira Eskola Kiroleko programak, lekuan lekuko... [+]
Aurrerantzean, Gipuzkoako klub batean jokatu nahi duen 8-12 urteko umeak ez du derrigorrez Eskola Kirolean parte hartu beharrik izango, EAEko Auzitegi Nagusiak hala ebatzita. Multikirol ereduaren kontrako errekurtsoa jarri duen familiaren hitzetan, ez da bidezkoa erakundeek... [+]
Palestinan gertatzen ari denarekiko haurrak ekidistantzian heztea ezinezko bihurtu da ikastetxe (eta etxe) gero eta gehiagotan. Adinaren arabera zer eta nola kontatu konplexua izan badaiteke ere, giza eskubideak, heriotza, injustizia… mintzagai dira ikasgela gero eta... [+]
IAk egin du deialdia, eta aurreratu du, Askatasunaren Ontzidiari erasotzen badiote, egunez aldatuko duela greba. "Estatu sionistarekin konplizeak diren instituzio zein enpresak irmoki seinalatzeko" baliatuko dute eguna.
Aurrekoan idatzitako Irakasleon figura artikuluaren harira, kontu esanguratsu bat landu nahiko nuke. Artikulu horretan aipatu bezala, jende askoren ahotan dabil irakasleon lan karga baxua dela (gehienbat hezkuntza publikokoena), eta ditugun pribilegioak gehiegizkoak direla. Ez... [+]
Euskal Eskola Publikoaren alde borrokatzea STEILASen ikurra da. Ikasturte hasierarekin batera, gogoratu behar da aurreko ikasturtean hainbat kolektibotan akordio garrantzitsuak sinatzea lortu genuela, hezkuntza publikoan grebak eta mobilizazioak egin eta gero. Lan-akordio horiek... [+]
Palestinan bideratzen ari den genozidioa salatu dute Euskal Herriko Unibertsitateko ordezkariek. Hainbat neurri hartuta ditu EHUk eta tartean, batzorde bat sortzeko proposamena egina dio errektoretzak Palestinaren aldeko unibertsitate mugimenduari, aurretik ere unibertsitateak... [+]
DBH, Batxiler eta Lanbide Heziketan irakasle izateko ez dela zertan irakaskuntzan formakuntzarik jaso, aski dela ikasgai horretako edukiak menperatzearekin. Hori legeztatzeko eskatu diote Espainiako Gobernuari hainbat erkidegotatik, eta gaia lehen planora ekarri berri du ELGAk,... [+]
Ikama ikasle antolakundeak deituta, ikasleak Palestinaren alde mobilizatu dira astearte honetan, Hego Euskal Herriko hainbat ikastetxe eta unibertsitatetan. “Denon erantzukizuna da egoerari buelta emateko salaketa egin eta mobilizatzea”.
Aintzane Mariezcurrena Afan elkarteko psikologoak nabarmendu du “oso garrantzitsua” dela txikitatik alzheimerrari loturako zalantzak argitzea eta gaiaz hitz egitea, haurrek beldurrik izan ez dezaten.
DBHko 4. mailan eremuka irakastea planteatzen duen curriculum agindua bertan behera utzi du Kataluniako Auzitegi Nagusiak, aurrez Batxilergoan egin zuen gisan. Eremukako proiektuen aurkako salaketa Aspepc DBHko irakasle katalanen sindikatuak jarri zuen.
"Erronka izugarria" duen mahaia jarri du martxan Eusko Jaurlaritzak, 50 bat eragilerekin: eskola segregazioa gainditzeko neurriak adostea. STEILAS eta ELA sindikatuek ez dute parte hartu; Jaurlaritzak oinarri dituen politikek segregazioa betikotzen dutela diote.
Hiru urte bete dituzten 1.404 ikasle berri matrikulatu dituzte D edo B ereduetan, Nafarroan. Adin guztiak kontuan hartuz, 27.334 ikaslek ikasiko dute euskaraz. Matrikulen 67,8% ikastetxe publikoen sarean izan da.
