Georgiako Atlanta hiriburuan, AEBetan, sortu nahi duten Polizia entrenamendu zentro berriak gatazkak eragin ditu: duela bi urte proiektua publiko egin zenetik istiluak izan dira eremuaren inguruan, herritar gehienek aurka egin baitute. Zentroa, hiriaren inguruko basorik handienean kokatua, basoen defentsarako mugimenduaren erdigune bihurtu da, baita AEBetako Polizia indarkeriaren aurkakoarena ere. Bertan izan diren istiluetan hildako bat izan da, eta autopsiak erakutsi du lurrean jarrita zela hamalau aldiz egin ziola tiro Poliziak. Azken protestetan 23 lagun atxilotu dituzte, “etxeko terrorismoa” egotzita. 35 urte arteko zigorra ezarri diezaiekete.

AEBetan Poliziaren inguruko edozein neurri da eskandalagarri, Polizia indarkeriaren datuek argudiatzen dute hori. Gainera, Atlantan gaia bereziki da sentikorra, herrialdean Poliziaren zaintza handiena duen hirietako bat baita: 2022ko aurrekontuaren herena baino gehiago, 250 milioi dolar inguru, Polizia departamendura bideratu zuten. Egoera horretan, Polizia entrenatuko duen zentro bat sortzeak alarmak piztu ditu hiriko zenbait kolektiboren artean: “Cop City”, polizien hiria, izena eman diote manifestariek zentroari. Aurka egin dute bizilagunen elkarteek, eskolek, arrazen arteko justiziaren aldeko taldeek eta baita ingurumenaren aldeko taldeek ere.

Azken horiek zentroaren kokapenaren aurka ari dira lanean, eraiki nahi duten lekua, Old Atlanta Prison Farm delakoa, lurraldeko berdegune garrantzitsu bat baita, eta proposatu dute South River Forest izenarekin mantentzea lekua, hirian alde handiak baitaude egoera ekonomiko eta klase sozialen artean; komunitate beltzen inguruan berdegune gutxi daudela diote. Baina ez da kasualitatea berdeguneak kartzela izena izatea, izan ere, bertan polizia indarkeria kasuak egon zirela baieztatu du ikerketa batek. Eremu hori mantentzearen alde agertu dira zenbait aktibista, memoriarako leku gisa.

Talde eta kolektiboek soilik ez, Atlantako hiritar gehienek ere ez dute nahi horrelako zentrorik. Biztanleen artean egindako galdeketa batean, iritzi emaileen %70 aurka agertu dira. Alde agertu direnen artean, aldiz, nagusi da Poliziaren etika lantzeko leku egoki baten aldarria.

Poliziak hamalau tiro, lurrean zegoenari

Proiektua jakinarazi zutenetik ari dira ingurumenaren defendatzaileak basoaren defentsan; 2021ean okupatu zuten basoa. Gerora, zenbait ekintza izan dira polizien aurka, baina 2022ko abendura arte ez zuen okerrera egin egoerak. Orduko hartan, Poliziak sarekada egin zuen, eta bost lagun atxilotu zituen, beraiek ere “etxeko terrorismoaren” aitzakiapean. 2023ko urtarrilaren 18an Manuel Esteban Paez Terán Tortuguita aktibista ekologista queer-a hil zuen Poliziak. Bere familiak argitaratu berri duen autopsiak jakinarazi du gutxienez hamalau aldiz egin ziola tiro Poliziak, baita aurpegian ere. Tortuguita, aldiz, lurrean zegoen, eskuak altxatuta zituela. Hilketa horren ostean heldu dira beste 23 atxiloketak, martxoan, South River Foresten musika festibal bat zegoela.

“Stop Cop City” mugimendua sortu dute erresistentzian ari diren taldeen artean. Black Lives Matter mugimenduarekin gertatu bezala, ez dauka gidaritza argi bat, eta jende eta influentzia askoren batura dira.