Akordioak publiko egin ditu CSAk, Ikus-Entzunezkoaren Kontseilu Nagusiak. Gardentasuna iristen da plataforma bakoitzarekin sinatutakoa argitaratzera. Hona adibidez, Netflix-ek sinatutakoa, Herbehereetan egoitza duen enpresa dela argi geratzen da, baina hala ere, Frantziarako betebeharrak onartzen ditu. Netflix eta besteek onartu dituzten arauen artean, auditoria bitartez irabazien kalkulua egingo dela, eta hortik eratorriko dela inbertsioaren kopurua.

Kopuru zehatzik ez da aipatzen beraz dokumentuetan, bakarrik kalkuluak nola egingo diren, baina Le Mondek uste du 250 milioi € eta 300 milioi € artean egon litekeela inbertsio totala, eta gehiena Netflix-ek jar dezakeela, 200 milioi inguru.

Oraingoz sinatzaileak dira Netflix  Amazon, Disney Plus eta Apple TV Plus, baina CSAk dio beste bost plataforma ere gehituko direla akordiora urtea amaitu baino lehen.

Inbertsioaren banaketa izango da 80/20 plataformetako eduki propioaren, eta zinema-aretoetarako ekoizpenen artean. Aretoetako %20 hori, ondoren, streaming plataformak izango du bere edukietan besteek baino lehen, baina hala ere, banaketa lehioen menpe egongo da kontua (hainbat hilabete esklusiban aretoetan, gero beste hainbat...). 

Abenduko akordio hauek dira ekainean onartu zen SMAD dekretuaren ondorioa. Eta SMAD dekretua da Frantziak legeztatu duena, Europak AVMS zuzentaraua aplikatuz. Izatez, Europako lehen estatua izan da Frantzia hau zehazten. AVMS-ren helburua zera da, gai honi dagokionez: streaming zerbitzuen ekoizpenaren parte bat Europan egin dadila, inbertsioa eta ekonomia bertan zirkulatzen jartzeko. Frantziako SMAD dekretuak horixe zehazten du, Frantziako ekoizpena bultzatu behar dela (frantsesez, gainulertzen da, ez beste hizkuntzetan).

Espainiako Estatua ere ikus-entzunezko lege bat onartzekotan da, baina aitzakia jarri du Gobernuak, inbertsioaren %6 hizkuntza ko-ofizialentzat izango zela adostu ondoren, hori ezin zaiela egoitza beste herrialde batzuetan duten erakundeei ezarri. CSAk Netflix eta besteekin sinatutakoa Frantzian demostratzen du Espainiako Gobernuak dioena ez dela egia.

SMAD dekretuaren beste ondorio bat da, behintzat uztaileko irakurketa batzuetan agertu zena, esplotazio eskubideena. Ondo ulertu badugu Varietyk orduan argitaratu zuena, Netflix-ek Frantzian ekoitzi duena (adibidez, Lupin telesaila), bere eskubideen menpekoa da betiko, orain arteko baldintzetan bederez. Aldiz, SMAD dekretuarekin, Frantziako ekoiztetxe batekin egiten badu telesail berririk Netflix-ek, eskubide esplotazio lehioa 36 hilabetera murriztuko da: 3 urte, eta ondoren, ekoiztetxe frantziar originalak izango du lanaren jabetza. Hau da, ez bakarrik sustatzen da Frantziako ekoizpena, baizik eta ekoizpen horren ustiapena lokala dela ziurtatzen da 3 urteren buruan, ez Herbereheetan edo Estatu Batuetan egoitza izan dezakeen Netflix delakoaren eskuetan.

Hau da, ilustrazioko adibidearekin azaltzeko: Lupin telesaila Frantziako Gaumont ekoiztetxearekin egin du Netflix-ek, eta oso ondo, pozik egongo dira Gaumont-ekoak. Baina SMAD dekretuaren arabera, ez hori bakarrik, telesailak arrakasta izan eta aurrera jotzekotan, haren ustiapen eskubideak Gaumont-ek lotuta izango ditu 36 hilabeteren buruan ere, ez Netflix-en esku.

Hala ere, 36 hilabeteko leiho honen aipurik ez dugu aurkitu aste honetan CSAk zabaldutako informazioan (akaso egongo da, geuk ez dugu aurkitu).