ARGIA.eus

2021eko irailaren 23a

'Parkean euskaraz' egitasmoa antolatu dute Iruñerrian, haurren euskara erabilera bultzatzeko

  • Bi eta sei urte bitarteko umeei eta beren familiei zuzendutako egitasmoa da. Astean behin, zazpi auzotako parkeetan elkartuko dira jolasak eta beste hainbat ekintza egiteko. Izen-ematea zabalik dago irailaren 23ra arte.

Iraitz Madariaga Etxebarria
2021eko irailaren 10a
Argazkia: Dindaia Fundazioa

Eragileek nabarmendu dutenez, egitasmoak txikienen eta nagusien arteko harremanetan hizkuntza ohiturak aldatzeko balioko du, heldu-haur, heldu-heldu eta hau-haur komunikazioa euskaraz lantzeko. Gainera, hizkuntza aisialdiaren eremura eramatean, “eskolatik kanpoko espazioarekin identifikatzea eta gozagarri egitea” lortu nahi dute. Bizilagun euskaldunen arteko taldeak sortzeaz gain, euskaraz bizitzeko “ahalduntzea” sustatzea da helburua.

Parte hartuko duten umeak bi azpitaldetan banatuko dituzte: bi eta hiru urtekoak batetik, eta lau, bost eta seikoak, bestetik. Bakoitza euskaraz dakien aita-ama, lagun edo senide batekin joan beharko da. Gurasoek “saio autonomo eta dibertsifikatuak” antolatzeko ardura izango dute: tailerrak, txangoak, jolas-libreak zein liburu-trukaketak.

Horretaz gain, Dindaia Fundazioak 24 jolas saioren kudeaketa egingo du 2021-2022 ikasturtean zehar. Sortzen elkarteak, HE Gurasoak taldeak, tokiko euskara zerbitzuek eta beste hainbat elkartek ere hartuko dute parte.

Proiektu gehiago

Bultzatzaileen arabera, “0-6 adin tartea oso berezia da umeen garapenean, orduan ezartzen baitira hainbat ikasketa-prozesuren oinarriak, hala nola, hizkuntzak ikasteko behar direnak”. Halere, ekimenaren bultzatzaileetako batek, Sortzen elkarteak, sei urtetik gorakoentzat zabaldu nahi duen dinamika ere garatu du. “Euskara Kalera” 6-12 urte bitartekoentzako ireki dute: Hegoalde ikastolan iaz hasi zuten proiektua da honakoa, eta aurten ere jarri dute martxan. Izen-ematea itxita dago egitasmo honetan.

Izen-ematea

“Parkean euskaraz” proiektuan parte-hartzeko, berriz, irailaren 23ra arte dago epea, eta nahikoa da galdetegi hau betetzea. Proiektuaren bultzatzaileek adierazi dutenez, momentuz, zazpi auzotan agertu dira prest ekimena burutzeko, baina talderik osatzea lortu ez duten auzo eta herritako interesatuei ere haiekin kontaktuan jartzeko eskatu diete.

Orain arte zehaztu diren ordutegiak, hauek dira:

  • Antsoain: Ostegunetan, 17:30-18:30. Harrobi ondoko parke gunean.
  • Arrotxapea: Ostegunetan, 17:00-18:00. Maiteminduen parkea (zokoa tabernaren parean).
  • Iturrama-Donibane: Astelehenetan, 17:00-18:00. Asenjo Pintorearen kalea 2
  • Arrosadia: Asteartetan, 17:00-18:00. Hegoalde ikastolako patioan.
  • Txantrea: Asteazkenetan, 17:00-18:00. Munduko parkean.
  • Alde Zaharra: Astelehenetan, 17:00-18:00. Baratxurien plazan.
  • Sarriguren: Zehazteke
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Euskara Iruñean kanaletik interesatuko zaizu...


Azkenak EGILEA
Argia buletina
Egunaren laburpena
zure e-postan
Eguneraketa berriak daude