Pantailarik gabeko harremanak bultzatu nahi dituzten familien bila

  • “Ez ditugu gure seme-alabak pantailaren bueltan hazi nahi”, azaldu digu Patxi Monterok. Horretarako, erronka interesgarria abiatu dute Debagoienako bi familiak: haurrak telebista eta mugikorretara entxufatu ordez bestelako harremanak garatu nahi dituzten familien bila dabiltza eskualdean, elkar ezagutu eta planak egiteko.


2020ko uztailaren 07an - 15:08

Patxi Monteroren etxean, mugikorra, ordenagailua eta internet badute, baina telebistarik ez. “Teknologia lanerako eta bizitzarako erreminta da, ez dugu satanizatzen eta zentzuz erabiltzen dugu, baina ez dugu muturrera joan nahi, eta gure ustez gaur egun teknologiaren gehiegizko erabilera egiten da”. Hori da saihestu nahi dutena: umea jaiki ahala telebista aurrean esertzea, seme-alabak bazkaldu dezan tableta piztea, bazkalostean gurasoak lasai egoteko haurra mugikorraren aurrean jartzea… “Zaintza teknologiko horrek kezkatzen gaitu, enbarazu egin ez dezan umea gailu teknologikoren baten aurrean aparkatzeak”.

Mugikorrak baldintzatutako harremanak

Gainera, mugikorra haurrei gero eta lehenago erosten zaie eta pantailaren bueltan eraikitzen diren harremanak egiteko modu hori ere ez du gustuko Monterok: “Ikus dezakezu lasai asko nerabe talde bat kalean, eta bakoitza bere pantailatxoari begira. Harremanak baldintzatzeraino mugikorrak hartu duen presentziari aurre egin nahi diogu”.

Bi familia dira Debagoienan amua bota duenak: Monteroren alabak 6 urte ditu eta beste familiarenak 10, eta pantailari lotuta egon nahi ez dutenen lagunartea osatu nahi lukete, “elkar ezagutu eta feeling-a izanez gero, planak egiteko”.

“Zaintza teknologiko horrek kezkatzen gaitu, enbarazu egin ez dezan umea gailu teknologikoren baten aurrean aparkatzeak”

"Jolasa, jolasa eta jolasa"

Haurrak pantailarik gabe hazteak gurasoen aldetik konpromiso eta ahalegin berezirik ez al duen eskatzen galdetu diogu Monterori. “Zuk guraso izatea aukeratu baduzu, guraso izatea aukeratu duzu, horrek dituen ardurekin. Eta gure kasuan behintzat, ez du ahalegin berezirik eskatzen, umeekin gaudenean umeekin egotea baino ez, horrek san nahi duen guztiarekin. Jolasa, jolasa eta jolasa, beste sekreturik ez dago; eta gure kasuan, naturan”.

Bi familia hauek Goiena agerkarian luzatu zuten deia, Pantailarik gabeko haurrak gutunean. “Sentsibilitate honekin bat baldin bazatoz eta halako harreman dinamiken bila baldin bazaude, deitu: 943 78 90 70 edo 675 94 46 09”, diote. Joan den ostiralean publikatu zuten gutuna eta dagoeneko bi familia jarri dira eurekin harremanetan. Zenbat gehiago lortuko dituzte?

Zarautzen, mugikorraren adina atzeratzearen alde

Gaiari lotutako esperientzia bat ere kontatu digu Patxi Monterok: Zarauzko ikastolako guraso talde batek kezka agertu zuen, seme-alabei mugikorra gero eta lehenago erosten zaielako, eta adina ahalik eta gehien atzeratzeko kanpaina orokortu zuten ikastetxean.


Irakurrienak
Matomo erabiliz
#1
Gorka Bereziartua
#3
AEK koordinakundea
#4
Ruben Sánchez Bakaikoa
Azoka
Kanal honetatik interesatuko zaizu: Haurren haziera
2024-03-14 | Sustatu
Kirol eta jolas: umeei kirol jolasak erakusteko material praktikoak, euskaraz

Athlon Kooperatiba Elkarteak Kirol eta Jolas egitasmoa abiatu du, Eusko Ikaskuntzaren Asmoz Fundazioarekin elkarlanean. Ekimenak Eusko Jaurlaritzaren Kultura eta Hizkuntza Politika Sailaren laguntza jaso du.


Jaioberrien orpo-probak 14 gaitz bilatuko ditu aurrerantzean EAEn, antzeman daitezkeen 50 gaitzetatik oraindik urrun

Jaioberriaren orpoan zizta eginez, hainbat gaitz aztertzen ditu osasungintza publikoak. Osakidetzak 14ra igo berri du aztertzen diren gaitzen kopurua, baina beste lurralde batzuekin konparatuta, atzeko postuetan dago EAE: Nafarroan 28 gaitz aztertzen dituzte, Galizian 33,... [+]


Haurren laurdenak, nerabeen gehiengoak eta helduen ia erdiak ez du ondo lo egiten

Gaizki edota behar bezainbeste ordu lo ez egitea normalizatu dugun arren, ondorio garrantzitsuak ditu, adinaren arabera ezberdinak. Loari minutuak lapurtzen dizkiogu helduok, denera heldu ahal izateko; umeen ordutegia berriz, “ez da euren beharren araberakoa, helduen... [+]


2024-02-18 | Hiruki Larroxa
Zigorraren kultura eta pedagogia feministak

Gaur egungo hezkuntza-sisteman, eskola-paradigma birplanteatu behar dugu. Zigor-neurrietan oinarritutako ikuspegi tradizionala baztertu, eta denbora luzean ikasleen ordena eta diziplina mantentzeko tresna gisa erabilitako praktika batzuen eraginkortasuna eta etika zalantzan... [+]


Eguneraketa berriak daude