Harrituta dira Ziburuko ama ikastolaren inguruko anitz, auzapeza ikastolaren aurka ari delako. Irailaren 2an eskola sartzea da eta egoera ezin hauskorragoa da. Maialen Tapia Ziburuko ikastolako irakasleak Berriari adierazi dionez ordea, kalapitak albo batera utzi eta ikasturtea hasten saiatuko dira.

Bi urteko hitzarmena zuten Ziburuko ikastolak eta Ziburuko Herriko Etxeak. Maiatzaren 30ean, Guy Poulou auzapezak adierazi zien ez zuela akordioa berrituko. Horren ondorioa: ikastola lurrik eta eraikinik gabe geratuko da.

Duela bi urte sortu zen Ziburuko ikastola, ama eskolako haurrak biltzeko. Marinelako eskola publikoan obrak egin behar zituzten eta eskola horretako ikasleak aisialdi zentrora eraman zituzten. Marinelan bi eraikin prefabrikatu jartzea adostu zuen Ziburuko ikastolak Herriko Etxearekin. Obrak bukatu dira ordea, eta Marinelara itzuliko dira eskola publikoko haurrak. Akordioa ere amaitu da, eta berritzeko intentziorik ez; areago, orain Paueko auzitegian da ama ikastolaren afera.