Esklusibotasuna kobratu arren, Osasunbideako hamar mediku enpresa pribatuan ari dira, LABek dioenez
Imanol Carrera Nafarroako LABeko koordinatzaileak ostegun honetan eman du horren berri Iruñean egindako agerraldian. Bere esanetan, praktika txar hori orokortua da Nafarroako osasun publikoan.
Nafarroako Gobernuko Osasun Departamenduak jakinarazi duenez, Osasun Zerbitzuko 2.300 medikuetatik 42k uko egin diote esklusibotasunari eta, beraz, ez dute jasotzen sare publikoan bakarrik aritzeagatik eskuratzen den diru-saria, gutxi gorabehera 800 bat euro hileko. LABek mediku horien zerrenda eskatu zion departamenduari, eta hark astelehen honetan helarazi zion.
Zerrenda eskuan, LABek salatu du hamar medikuk esklusibotasunaren diru-saria jaso eta, gainera, mediku lanetan ari direla klinika pribatuetan. Hori legearen aurkakoa dela diote sindikatutik, eta gainera, egoera larriagoa dela, horietako mediku batzuek esklusibotasuna eskatzen duten ardurak dituztelako.
Karrerak azaldu du legez kanpoko jarduera horiek oso sustraituta daudela Osasunbidean, eta eskatu dio Foru Gobernuari miaketa zorrotza egin dezala kasu guztiak azaleratzeko. Iragarri du, halaber, salaketa jarriko duela Praktika Onak eta Ustelkeriaren aurkako Bulegoan.
Orain salatutako kasu horiei gehitu behar zaio iragan otsailaren 8an LABek berak azaleratu zuen beste kasu bat: Lizarrako García Orcoyen Ospitaleko Obstetrizia eta Ginekologia buruak ere esklusibotasun saria eskuratzen zuen eta, aldi berean, eremu pribatuan ere ari zen mediku lanetan.
Azken asteetan bolo-bolo dabil medikuen esklusibotasunaren gaia Nafarroan, Nafarroako Medikuen Sindikatuak bere grebarako erabilitako eskakizunetako bat izan baita, hots, esklusibotasuna kobratzea eta, aldi berean, klinika pribatuetan lan egin ahal izatea. Gainerako sindikatuak eskaera horren aurka agertu dira, horrek zerbitzu publikoa kaltetzen duelakoan, eta Osasun Departamenduak ere, azkenean, ez du onartu eskaera hori.
Greba 23an eta manifestazioa 18an
Puri-puri dago lan gatazka Osasunbidean eta sindikatu nagusienek beste greba bat deitu dute hilaren 23rako, Osasun Departamentutik egindako eskaintzak haien eskaerak ez dituelako guztiz asetzen. Datorren larunbatean, halaber, Nafarroako Osasun Plataformak manifestazio deialdia egin du Iruñean, 17:30ean Golemetan. Gehiengo sindikalak sostengua erakutsi dio mobilizazioari.
Azpian, LABek eman duen pertsaurrekoaren zati bat:
Kasu gehiago agertzeak baieztatzen du Osasunbidean esklusibotasunaren praxi txarra orokortuta dagoela eta Ustelkeriaren Aurkako Bulegoak berehala ekin behar diola pic.twitter.com/Hs0ABKXQ7E
— LAB Nafarroa (@LABnafarroa) March 16, 2023
904.000 milioi euro. Hori da ustelkeriaren kostua urtean Europar Batasunean, 2020an egindako ikerketa baten arabera. 2008. eta 2020. urteen artean 3.743 ustelkeria kasu plazaratu ziren komunikabideetan Espainiako Estatuan, horietatik 109 Hego Euskal Herriari zegozkien. Atzera... [+]
Guardia Zibilaren esanetan, Victor de Aldama enpresariak ordaindutako diru kopurua litzateke hamar milioi euroko hori, eta Espainiako Garraio Ministerioak pandemia garaian egindako salerosketei lotuta legoke. Ostegun honetan utzi dute aske García, epailearen aurrean... [+]
EH Bilduren helegite baten bidez, Gipuzkoako Lurralde Auzitegiak berriz ireki du Bidegi auziko bi kereiletako bat, AP1 autobidearen Eskoriatza-Arlaban zatiari dagokiona. Pasa den irailean Azpeitiko epaitegiak erabaki zuen kasua behin behinean artxibatzea. Orain, auzitegiak... [+]
Eusko Jaurlaritzako Ingurumen sailak ez zuen Artaxoara eramandako hondakinen karakterizazioari buruzko informaziorik; hala dio Eusko Legebiltzarrera igorritako dokumentazioan. Gipuzkoako erraustegia kudeatzen duen Ekondakinek lixibiatuak bidaltzen jarraitu zuen, Ecofert enpresak... [+]
Ustelkeriaren kontrako Espainiako Estatuko fiskalak berretsi du Iberdrolak argindarraren prezioa manipulatu zuela 2013an, eta urtegietatik ura kentzen aritu zela frogatutzat eman du, konpainia elektrikoaren kontra egiten ari diren epaiketan.