Emakumeak borrokan

Osakidetzan ordezkoen falta arazo: ordutegian murrizketak eta lan-baldintzetan atzerapausoa

  • Lehen arretako zerbitzuetan ordutegi murrizketak egin ditu osasun publikoak hainbat zentrotan. Bestalde, Basurtuko ospitalean kontziliaziorako arazoak izaten ari dira fakultatiboak.

ARGIA @argia
2019ko uztailaren 11
Gasteizko Lakuabizkarrako zentroa da kaltetuetako bat (arg.: GGB arquitectos)

Uda sasoia iritsi da eta Osakidetzak bere arreta zerbitzua murriztu du, bere webgunean ohar bidez iragarri duenez. Landa eremuko kontsultategietan eta Etengabeko Arreta Guneetan eragingo du neurriak "arreta hori bateragarri egiteko asistentziaren eskaera txikiagoarekin eta langileen oporretako atsedenaldirako eskubidearekin", dio oharrak. Osakidetzak nabarmendu du "urtero" egin ohi dela murrizketa.

Halabaina, LABek salatu du zentro ugaritan ateak arratsaldeko 20:00etan itxi beharrean, 17:00etan edo 15:00etan itxiko dituztela eta "aldebakartasunez eta arduragabekeriaz" jokatu duela. Sindikatuaren esanetan, Osakidetzak ordezkapen faltarekin argudiatzen du murrizketa, baina hiru greba egun eragin dituen egoerari aparteko orduak ordainduz erantzun diela: "Hori da EAJ-ko buruzagiek, langileon lan agenda onargarriak antolatzeko aldarrikapenari emandako erantzuna".

Ugari dira ordutegia murriztuko duten zentroak. Gasteizen esaterako, Hala Bedik idatzi duenez "periferiako" arreta guneak izango dira kaltetuenak, hala nola Zabalgana, Aranbizkarra edo Zaramagako anbulategiak.

Kontziliazio arazoak Basurtuko ospitalean

Ordezko faltak langileei ere arazoak sorrarazi dizkiete uda honetan. Basurtuko Ospitaleko Anestesiologia eta Bizkortze zerbitzuetako hainbat fakultatibori kontziliaziorako neurriak ukatu dizkie Osakidetzak, ELAk adierazi duenez. Seme-alabak zaintzeko eszedentziari ezezkoa eman die, "ordezko nahikorik ez duten aitzakiatan".

Sindikatuak gogorarazi du Osakidetzako langileen %80 emakumeak direla eta, zentzu horretan, halako erabakiek genero-desberdintasunean sakontzen dutela: "Osakidetzaren benetako apustua baldin bada emakumeekiko diskriminazioa bere ardurapeko esparruan ezabatzea; orduan, lehenengo, egunero hartzen dituen erabaki batzuk diskriminazio-egoeren sorrarazleak direla jabetu behar da –dio ELAk–; eta, bigarren, horrelako erabakiak eta enplegu-politikak errotik aldatu behar ditu".

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Murrizketak  |  Osasuna  |  Osakidetza

Murrizketak kanaletik interesatuko zaizu...
Azkenak
EGILEA
Eguneraketa berriak daude