OlatuKoopek indarberrituta ospatuko du Azpeitian 'Saretze Eguna'

  • Lau urte igaro dira ekonomia eraldatzailearen sarea eratu zela eta jadanik 26 dira bertan parte hartzen duten enpresa komunitarioak.

ARGIA @argia
2018ko ekainaren 07a

OlatuKoopek egun berezia izango du larunbatean, hilak 9, Azpeitian. Saretze Eguna ospatuko dute ekonomia sozial eraldatzailearen inguruan dabiltzan proiektu, kooperatiba eta egitasmoek elkar ezagutzeko.

2014an “olatu kooperatibo berri bat” sustatzeko helburuz sortu zenez geroztik sarea hedatu egin da eta haren partaideak bikoiztu baino gehiago egin dira. Hamalau enpresa komunitario dira dagoeneko OlatuKoopeko  bazkideak eta beste hamabi kideak –ARGIA ere bertan dago–.

Urte osoa barne egituraketan murgilduta egon eta gero “indarberritu” egin da sarea, parte hartzeko aukerak ugaritu eta lantaldeak sortu ditu, baita idazkaritza teknikoa eratu ere.

OlatuKoopek hainbat proiektu jarri ditu martxan lankidetzan urteotan, hala nola bestelako ekintzailetasun sozial bat bultzatzeko KoopFabrika programa edo memoria kooperatiboa eta ekonomia eraldatzailea bisibilizatzeko Batura egitasmoa.

Ekainaren 9an, Saretze Eguna

Zita garrantzitsua dute datorren larunbatean. Goizeko 10.00etatik aurrera Saretze Eguna ospatuko dute Azpeitiko San Agustin kulturgunean: ekintzailetza kooperatiboari buruzko liburu aurkezpena, saretzeari buruzko mahai-ingurua eta hainbat proiektu ezagutzeko parada izango dute bertaratutakoek besteak beste; amaieran bazkaria ere egingo dute.

Egitarau osoa ikusteko eta izena emateko OlatuKoopen webgunera jo daiteke.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Ekonomia eraldatzailea  |  Kooperatibagintza

Ekonomia eraldatzailea kanaletik interesatuko zaizu...
Azkenak
EGILEA
Eguneraketa berriak daude