Neoliberalismo oztopatzaileaz


2022ko urtarrilaren 28an - 12:51
Azken eguneraketa: 13:52

Joanak dira beste hamabi hilabetez, bederen, Olentzero eta Mari Domingi, Eguberri eta opari sasoia. Ez da gelditu, ordea, kontsumitzeko aroa, izan ere, orain, esaterako, beherapenen garaian zeharo murgilduta gaude. Laster, maiteminduen eguna ere etorriko da eta hala, kapitalismoak bultzatuta, hilabetez hilabete beste hainbat kontsumitzeko aitzakiarekin burua berotuko digute. Hori baita bizi garen gizarte neoliberal honek duen helburu bakarra: diru gutxi daukanaren poltsikoa gehiago hustea asko daukanarena betetzeko.

Gizarte neoliberal honetan bizi beharra da, hain zuzen, eta zoritxarrez beste askoren artean, feminismoaren laugarren olatuaren oztopo nagusienetako bat. Esate baterako, neoliberalismoak feminismoari eragiten dion kalte izugarri bat denak salerosketa prezioa izatea eta horren ondorioz, diruaren truke dena eskuragarri izatea da. Izan ere, kultura neoliberal honek aukera eman die dirua daukatenei nahi duten guztia eskuratzeko soilik dirua izateagatik. Baina dena al da zilegi?

Horren adibide dira prostituzioa eta haurdunaldi subrogatua. Azken hori espainiar estatuan ez da legezkoa, baina, hala ere, zerbitzu hori eskaintzen duten ehunka iragarki ikus daitezke Interneten. Badira, ordea, emakumeen sabelak erostea legezko ekintzatzat jotzen dutenak, hala nola, Estatu Batuak, Errusia eta Erresuma Batua, beste hainbaten artean. Estatu Batuetan esaterako, azken urteotan gorakada nabarmena jasan du “negozio” horrek eta 25.000 emakume izatera iritsi dira. 

Kejsa Ekis Ekman aktibista eta idazle suediarrak esan bezala, prostituzioak eta haurdunaldi subrogatuak hainbat antzekotasun dituzte. Biek lortzen dute etekina emakumeen gorputzetatik, batak sexutik eta besteak umetokitik. Oinarrizko giza funtzioetatik industriak sortu dituzte biek, batak sexualitatetik eta besteak ugalketatik. Emakumeen gorputza produktu bilakarazi dute.

Hortaz, ume bat izateko irrikaz dauden horientzat, adopzioa izan daiteke ziur aski irtenbide egokiena. Hala ere, prozesu luzeegia eta garestiegia delakoaren ustea oso hedatua dago. Eta usteak erdia ustel. Izan ere, prozesua luzatu eta garestitzen duena haurra aukeratzeko unean milaka baldintza jartzen dituena da, hau da, aita edo ama izango den hori, hain zuzen. Eta adoptatzea ez da neoliberalismoa bultzatu eta produktu bat aukeratu eta erostea, benetan beharrizana duten haurrei laguntzea baizik. Bestela bizimodu latza edo agian bizia bera ere izango ez luketenei laguntza eskaintzeko eta buruan dirua baino ez duten horiei kontra egiteko aukera paregabe bat da adopzioa.

Bidali zure iritzi artikuluak iritzia@argia.eus helbide elektronikora

ARGIAk ez du zertan bat etorri artikuluen edukiarekin. Idatzien gehienezko luzera 4.500 karakterekoa da (espazioak barne). Idazkera aldetik gutxieneko zuzentasun bat beharrezkoa da: batetik, ARGIAk ezin du hartu zuzenketa sakona egiteko lanik; bestetik, egitekotan edukia nahi gabe aldatzeko arriskua dago. ARGIAk azaleko zuzenketak edo moldaketak egingo dizkie artikuluei, behar izanez gero.


Eguneraketa berriak daude