Muga eta debekuen gainetik, ikasleen garapen integrala erdigunean

  • “Administraziotik datorren protokoloaren aginduak sarri ez datoz bat gure pedagogia ikuspegiarekin, eta sekulako puzzlea egin behar izan dugu”. Ikastetxe askok bizi dutena islatzen dute hitzok. Oiongo eskola publikoko ikasketa buruarenak dira; ikasturte berrian espazioaren berrantolaketa –kanpoko guneak aintzat hartuz–, ikasle talde txikiak, harreman eta emozioen kudeaketa, errefortzu akademiko, linguistiko eta digitala, eta proiektukako ikasketa kooperatiboa dituzte ardatz Oionen.


2020ko irailaren 09an - 00:03

340 ikasle eta 36 irakasle ditu Arabar Errioxako ikastetxe honek eta uda aurretik hasi zen protokoloa prestatzen ikastetxeko zuzendaritza taldea. Gero irakasle eta gurasoen ekarpenak jaso dituzte, ikaslearen garapen integrala oinarri duen plan estrategikoa zehazteko: garapen fisikoa, emozionala, soziala eta akademikoa hartu dituzte kontuan. Mikel Kolomo ikasketa buruak azaldu dizkigu planaren gakoak: “Hainbeste muga jartzea esparru emozionala eta soziala garatzeko zailtasun izan daiteke, eta guk ikasketa kooperatiboan eta emozioetan oinarritzen dugu gure pedagogia, baina espazioak eta distantziak ondo erabiliz, ildo horiei eusten saiatuko gara, guretzat funtsezkoa delako ikasleak kooperatiboki eta taldean aritzea”.

Mugak

“Distantzia da guretzat muga nabarmenetakoa. Haurra taldean haztea, heztea eta taldean ikastea bilatzen dugu, talde baten parte izatea, eta kontaktu zuzena baztertu beharrak esan nahi du talde dinamika eragoztea, baina saiatuko gara, neurriek uzten diguten heinean, lankidetza izatea oinarrian”.

Kanpoko espazio eta jardueren aldeko apustua egin dute eta irakasleek asmoa agertu dute bai jolastokia bai eskola kanpoko gune eta berdeguneak erabiltzeko

Espazioaren berrantolaketa

Erabatekoa izan da ikastetxean egin duten berrantolaketa. Hasteko, ikasleak ez daitezen elkartu ikaskide askorekin, hiru eremu bereiztu dituzte: Haur Hezkuntza batetik –aparteko eraikin batean–, Lehen Hezkuntzako lehen hiru mailak bestetik –solairu berean–, eta Lehen Hezkuntzako azken hiru mailak azkenik –beste solairu batean–.

Horrez gain, kanpoko espazio eta jardueren aldeko apustu garbia egin dute eta irakasleek aukera dute bai jolastokia bai ikastetxe kanpoko gune eta berdeguneak erabiltzeko. Ikasketarako egokiak diren herriko eremu irekiak identifikatu dituzte eta irakasle taldeak orokorrean kanpora ateratzeko asmoa agertu du. Ikasgela barruan, “aurten inoiz baino gehiago ate eta leihoak zabalik mantenduko ditugu”.

Haur Hezkuntzarako planteatuta zuten egokitzapena bertan behera utzi behar izan dute, ikuskariak ez dielako utzi gurasoei ikastetxean sar daitezen. Alternatiba? Egokitzapenak kanpoan abiatu dituzte, herriko plaza eta parketan. “Azken finean, herria ikastetxearen parte dela sentitzen dugu eta herriari ematen diogun gisan, herritik ere jasotzen dugula”.

 

 

 

Ikuskariak ez die utzi gurasoei egokitzapenerako ikastetxean sartzen. Alternatiba? Egokitzapenak herriko plaza eta parkeetan egin dituzte.

 

 

 

Talde txikitan

10-11 ikasleko taldeak lortu dituzte Oionen. Ikastetxe askotan amesten duten eta baliabide faltagatik –irakasle faltagatik– ezinezkoa zaien ratioa dute hemen. Ikasgela kopurutsuenak, 20-21 ikaslekoak, bitan banatu dituzte. Hori egiteko, batetik, espazio gehiago lortu dute, ikasleek gela bakarra erabili dezaketenez, besteekin partekatzen zituztenak (musika gela, informatikakoa…) bikoizketak egiteko aprobetxatu dituztelako. Bestetik, ohiko irakasleez gain laguntzaileak baliatu dituzte talde bakoitzak irakasle bana izan dezan (hizkuntza errefortzura bideratutako hezitzaileak, Gorputz Heziketako irakasleak laguntzarako dituen orduak…). “Tetrisa egin dugu bikoizketak koadratzeko. Irakasleen konpromisoa ezinbestekoa izan da, funtzio eta antolaketa berri hau gauzatzeko”.

Harremanak helburu

“Gure haurrek hilabeteak eman dituzte etxean sartuta edo elkar ikusi gabe, eta ezin dugu onartu euren artean harremanik ez izatea”, dio Kolomok. “Haur Hezkuntzan eta Lehen Hezkuntzako lehen zikloan aukera handiagoa dugu talde egonkorrak sortu eta euren artean jolastu ahal izan dezaten, gutxieneko interakzioa behintzat bermatuz. Goragoko mailetan, gakoa izan da ikasle taldeak ahalik eta txikienak izatea, neurriekin bada ere harremanak bermatzeko eta positibo kasuren bat baldin badago egoera ahalik eta kontrolatuena izateko, kontaktu zuzenak mugatuz”.

Harremanak bermatzeko, gakoa izan da ikasle taldeak ahalik eta txikienak izatea, positibo kasuren bat badago egoera ahalik eta kontrolatuena izateko

Errefortzuak, hiru norabidetan

Hezkuntza eta hizkuntza arrakalak areagotu zituen konfinamenduak, eta errefortzuak indartzea iportantea izango da ikasturte hasiera honetan. “Premia berezia duten ikasleen kasuan, arreta pertsonalizatuagorako behar genituen giza-baliabideak lortu ditugu. Alde horretatik, guk zortea izan dugu”, azaldu du ikasketa buruak.

Oro har, hiru adar nagusitan jarriko dituzte indarrak: euskara, gaitasun digitalak eta emozioak. “Oiongo testuingurua zaila da euskarari dagokionez, eta beraz hor jarriko dugu fokua eta ditugun baliabideak; laguntza saioak handituko ditugu hizkuntza arloan. Gaitasun digitalak ere espreski landuko ditugu, aurreko ikasturtean gertatu zena saihesteko. Etxean sartu gintuzten momentuan, haur asko erabat galdurik geratu ziren, eta hortaz, oraingoan aurretik landu nahi ditugu gaitasun digitalak, berriz ere etxera baldin bagoaz arrakala handitu ez dadin”. Horretarako, informatika gelako ordenagailuak ikasgeletan banatu dituzte eta txokoak sortu dituzte gela bakoitzean, gaitasun digitalak garatzeko: “Ikasleentzat esanguratsuak izan daitezkeen erronkak proposatuz landuko ditugu”. Gailu gehiago ere eskatu dituzte, behar duten familientzat.

Hirugarren hanka emozioak dira, ikaslearen garapen integralerako funtsezko. “Emozionalki egoera orekatuan ez dagoen ikaslearen ikaskuntza ez da ongi garatuko. Taldea ongi kohesionatuta egotea helburu garrantzitsua da eta batez ere ikasturte hasiera eskaintzen diogu hori lantzeari, aurten are gehiago, noski: talde egonkorra harremanetan osasuntsua eta denentzat erosoa eta espazio segurua izatea bilatzen dugu. Talde kohesionatua lortzen duzunean, elkartuta egiten du aurrera taldeak”.

Mikel Kolomo: "Konfinatu gintuztenean, haur asko erabat galdurik geratu ziren; oraingoan aurretik landu nahi ditugu gaitasun digitalak, berriz ere etxera baldin bagoaz arrakala handitu ez dadin"

Curriculuma, proiektuka

Proiektu bidezko metodologia darabilte Oiongo eskola publikoan. Eskola osoan lantzeko proiektu amankomunak dira eta gela guztiek lortzen dute proiektu bakoitzean konpetentzia jakinak garatzea, curriculumeko atalak landuz. “Modu kooperatiboan eta proiektuka lan egiteak aukera ematen du ikasleen interesetatik abiatzeko eta ikasi dutenari zentzua emateko”.

 


Kanal honetatik interesatuko zaizu: Hezkuntza
Jokin Pantxeska Etxebarria. Gerrako ume, aitaita
"Hiru aldiz esan dute gorria naizela, komunista!"

Irisarriko herrigunera sartu orduko, hantxe, etxe baten atarian, ikurrina eta estelada. Jokin Etxebarriaren bizitokia duzu. Gerrako ume izandakoa, hamaika ibilera –eta hamaika baino gehiago ere bai–, han eta hemen egindakoa. 92 urtek nahi beste bizitzeko aukera... [+]


2024-03-25 | ARGIA
Baserrien zurezko egiturak berritzen ikasteko programa martxan jarri dute mugaz bi aldeetako erakundeek

"Baserriberri" du izena programak eta langabezian diren Euskal Herri osoko 12 ikasleri zurgintza formazioa emango die, erortzear diren baserriak berritzen ikas dezaten.


Irakasleek (ere) aurreiritziak dituzte eta ikasleen notetan eragiten dute

Irakasleek nota hobea jartzeko joera dute klase altuko ikasleei, neskei eta, laguntze aldera, migratzaileen seme-alabei, baina epe luzera, migratzaileen seme-alaba horiengan espektatiba akademiko txikiagoak dituzte, baita baldintza sozioekonomiko okerragodun haurrengan ere. Hori... [+]


Katalunian protesta, hemen paso

Kataluniako Hezkuntza Sailak (ERC) bertako ebaluazio diagnostikotik ahozko proba kentzea erabaki zuenean, segituan altxa ziren horren kontrako ahotsak: Junts alderdiak, Intersindical sindikatu independentistak eta Plataforma per la llengua eragile sozialak ikasleen ahozko... [+]


Hezkuntza sistema sozialista aldarrikatu dute ikasleek, martxoaren 20ko ikasle greban

Grebara jo dute bigarren hezkuntzako, lanbide heziketako eta unibertsitateko ikasleek. Ikastetxeen ohiko jarduna gelditu eta kaleak hartu dituzte “negozioen eta inposizioen” hezkuntzaren kontra Bilbon, Donostian, Gasteizen eta Iruñean. Goizeko aurreneko... [+]


Eguneraketa berriak daude